जळगावातील अट्टल दुचाकी चोरटे शहर पोलिसांच्या जाळ्यात : सात गुन्ह्यांची उकल

Jalgaon’s persistent two-wheeler thieves caught by city police : Seven crimes solved जळगाव (20 जुलै 2025) : जळगाव शहर पोलिसांनी वाहन चोरीचे सात गुन्हे उघडकीस आणले असून शहरातील अट्टल चोरट्यांना अटक केली आहे.

शहर पोलिसात दाखल होता गुन्हा
जळगावच्या गोलाणी मार्केटसमोर, मायटी ब्रदर्स दुकानासमोरून 14 जुलैच्या रात्री 61 हजार रुपये किंमतीची फोर्स कंपनीची टेम्पो (एम.एच.19-0666) आणि 30 हजार रुपये किंमतीचा किर्लोस्कर कंपनीचा 30 किलोवॅटचा जनरेटर मिळून 91 हजार रुपये किंमतीचा मुद्देमाल चोरीला गेला होता. याप्रकरणी मिलिंद मुकुंद थत्ते यांनी शहर पोलिसात गुन्हा दाखल होता.

फुटेजवरून आरोपी जाळ्यात
संशयित आरोपी टेम्पोसह जामनेर, बोदवड मार्गे मलकापूर-नांदुरेकडे गेल्याची माहिती पोलिसांना मिळाल्यानंत त्यांनी पाठलाग सुरू केला असता आरोपींनी वडनेर भोईजी गावाजवळ अपघात करून वाहन सोडून पळ काढला. अधिक माहिती काढल्यानंतर, आरोपी घटनेच्या काही किलोमीटर अंतरावर एका ढाब्यावर बसलेले आढळून आले. त्यांच्या हाव-भावावरून आणि अंगावरील जखमांवरून संशय आल्याने, पोलिसांनी त्यांना ताब्यात घेऊन विचारपूस केली असता, त्यांनी गुन्ह्याची कबुली दिली.

या आरोपींना अटक
आरोपींनी आपले नाव मंगेश सुनील मिस्तरी (20, रा.कांचन नगर, जळगाव, ह.मु. शिरसोली) व यश अनिल सोनार (20, रा. समता नगर, जळगाव, ह.मु. शिरसोली) असल्याचे सांगितले. आरोपींकडून जनरेटर व्हॅन, टाटा एस छोटा हत्ती मालवाहतूक चारचाकी वाहन आणि पाच मोटरसायकल, असा एकूण दोन लाख 36 हजारांचा मुद्देमाल जप्त केला. जळगाव शहर पोलीस ठाण्यातील एक, जिल्हापेठ पोलीस ठाण्यातील तीन, एमआयडीसी पोलीस ठाण्यातील दोन आणि रामानंद नगर पोलीस ठाण्यातील एक मिळून सात गुन्हे उघडकीस आले आहेत.

यांनी केली कारवाई
पोलीस अधीक्षक महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी संदीप गावीत, शहर पोलीस निरीक्षक सागर शिंपी यांच्या मार्गदर्शनाखाली गुन्हे शोध पथकातील एएसआय सुनील पाटील, हवालदार उमेश भांडारकर, हवालदार सतीश पाटील, नंदलाल पाटील, योगेश पाटील, वीरेंद्र शिंदे, पो.ना. भगवान पाटील, अमोल ठाकूर, पांचाळ, प्रणय पवार आणि भगवान मोरे आदींच्या पथकाने केली.