Lok Adalat in Yaval Court on Saturday यावल (10 सप्टेंबर 2025) : राष्ट्रीय विधी सेवा प्राधिकरणाच्या माध्यमातून भारतभर लोक अदालतीचे आयोजन करण्यात आले आहे. या अनुषंगाने यावल विधी सेवा समितीचे अध्यक्ष तथा प्रथम वर्ग न्यायाधीश आर.एस.जगताप तसेच सहदिवाणी न्यायाधीश जी.आर.कोलते यांच्यातर्फे शनिवार, 13 सप्टेंबर रोजी होणार्या राष्ट्रीय लोक अदालती मध्ये जास्तीत-जास्त केसेसचा निपटारा करण्याचे आवाहन करण्यात आले.
भारतभर राष्ट्रीय लोक अदालत
राष्ट्रीय विधी सेवा प्राधिकरणाच्या वतीने शनिवार, 13 सप्टेंबर रोजी भारतभर राष्ट्रीय लोक अदालतीचे आयोजन करण्यात आले आहे. यावेळी न्यायप्रणालीमध्ये प्रलंबित प्रकरणांचा निपटारा केला जात असतो. या लोकअदालतीमध्ये आपापसातील मतभेद, तंटे, न्यायप्रविष्ठ वाद मिटवण्याची संधी असते.
झटपट न्याय मिळण्यास मदत
लोक अदालत ही न्याय मिळवून देण्याची जलद, फायदेशीर आणि सोपी पद्धती आहे. लोक अदालतीमुळे कायद्याची औपचारिक भाषा वगळून सहज सोप्या भाषेत वादी प्रतिवादी यांना समजेल अशा भाषेत तसेच दोन्ही पक्षांना मान्य होईल, असा न्याय निवाडा केला जातो. ज्यामुळे न्यायव्यवस्थेवरील ताण कमी करण्यास मदत मिळते. शिवाय ही बाब खर्चिक नसल्याने आणि पुन्हा अपिलाची तरतूद नसल्याने लोकांना झटपट न्याय मिळण्यास मदत होते.
लोकअदालतीचा लाभ घेण्याचे आवाहन
समाजात सोहार्द टिकवण्यासही सहकार्य लाभते. या लोक अदालतीच्या माध्यमातून नगरपालिका अथवा ग्रामपंचायतीची थकीत कर वसुली, नळपट्टी, राष्ट्रीय बँकांची कर्ज प्रकरणी, वीज मंडळाची थकित वीजबिले, भारतीय दूरसंचार विभागाची थकीत फोन बीले इत्यादी विविध न्यायपूर्व प्रकरणी किंवा न्यायप्रविष्ट प्रकरणांचा झटपट निकाल लावण्यात येतो. न्यायालयीन लांबलचक प्रक्रिया टाळता येऊन लवकरात लवकर निकाल लागण्यास मदत होते म्हणून या लोक अदालतीच्या अनुषंगाने यावल न्यायालयाचे प्रथम वर्ग न्या.आर.एस.जगताप यांनी शनिवार, 13 सप्टेंबर रोजी होणार्या लोक अदालतीचा लाभ घेण्याचे आवाहन करण्यात आले.
