jalgaon dal trader cheated of Rs 36 lakh 39 thousand : Two arrested जळगाव (11 सप्टेंबर 2025) : जळगाव शहरातील दाल व्यापारी विनोदकुमार चंचलचंद जैन (41) यांची सुमारे 36 लाख 39 हजार 650 रुपयांची फसवणूक झाल्याचा प्रकार समोर आला आहे. एमआयडीसी पोलिसात या प्रकरणी चौकडीविरोधात गुन्हा दाखल होताच दोघांना बेड्या ठोकण्यात आल्या.
असे आहे फसवणूक प्रकरण
तक्रारदार विनोदकुमार जैन हे दाल व्यापारी आहेत तर सुरजकांत व्यास हा त्यांच्या मार्फत दलालीचा व्यवसाय करतो. सुरजकांत व्यास याने जैन यांचा विश्वास संपादन करून, मालाचे पैसे तत्काळ देण्याचे आश्वासन दिले. त्यानंतर जैन यांनी संशयित आरोपींना मुग डाळ (कच्चा माल) पुरवला. मात्र, चौघांनी परस्पर संगनमत करून, परस्पर मालाची विक्री केली आणि त्याचे पैसे जैन यांना परत दिले नाहीत. जेव्हा जैन यांनी आपल्या पैशांची मागणी केली, तेव्हा चौघांनी त्यांना उडवा-उडवीची उत्तरे दिली.
आम्ही पैसे देणार नाही, तुझ्याकडून जे होईल ते करून घे, आम्ही कोणाला घाबरत नाही, पुन्हा आमच्याकडे पैसे मागितले तर तुला सोडणार नाही, अशी धमकीही दिली. या प्रकारानंतर, जैन यांनी एमआयडीसी पोलिसात तक्रार दाखल केली.
चौकडीविरोधात फसवणुकीचा गुन्हा
विनोदकुमार जैन यांच्या तक्रारीवरून बालाजी ट्रेण्डिंगचे दलाल सुरजकांत ऊर्फ राज संजय व्यास, किशोर ट्रेडर्सचे प्रोप्रायटर किशोर मिठालाल पुरोहित, आयुष ट्रेडर्सचे प्रोप्रायटर दीपक राजेश व्यास आणि विष्णुकांत लक्ष्मी नारायण पुरोहित ट्रेडर्सचे प्रोप्रायटर श्रीकांत पुरोहित यांच्या विरोधात फसवणुकीचा गुन्हा दाखल करण्यात आला.
पोलिसांनी दोन आरोपींना अटक केली असून तपास पोलिस उपनिरीक्षक अशोक काळे करत आहेत.
