Prices dropped after GST cut : Seven hundred new two-wheelers on the road in Bhusawal भुसावळ (21 ऑक्टोबर 2025) : गत महिन्यात जीएसटीच्या कपातीमुळे दुचाकींचे दर 8 ते 10 हजार रुपयांनी कमी झाले. यामुळे आता दिवाळीत दुचाकी खरेदीचे प्रमाण वाढले आहे. गेल्या वर्षी दिवाळीत 400 दुचाकींची विक्री झाली होती. यंदा शहरातील विविध शोरुममध्ये 600 दुचाकींची बुकींग व विक्री झाली असून 60 ते 70 दुचाकी, ई बाईक्स विना बुकींगचे विक्री होऊ शकेल. यामुळे यंदाच्या दिवाळीत भुसावळातून 700 पेक्षा अधिक दुचाकी विक्री होण्याचा अंदाज आहे. यातून किमान सहा ते सात कोटींची उलाढाल झाल्याचा अंदाज आहे.
जीएसटी कपातीचा दिलासा
गणेशोत्सवाच्या दरम्यान जीएसटीमध्ये कपात करण्याचे पंतप्रधान मोदींनी जाहिर केले होते. यामुळे दर कमी होतील म्हणून दुचाकींची बुकींग व खरेदी थांबली होती. यानंतर बर्‍याच जणांनी नवरात्रोत्सवाचा मुहूर्त साधून खरेदी केली. यानंतर आता दिवाळीचा मुहूर्त पाहून खरेदी केली जात आहे. धनत्रयोदशीलाही चांगली मागणी राहिली. दिवाळीच्या काळात शहरात 600 दुचाकींची बुकींग झाली आहे. दुचाकींमध्ये पारंपारिक पेट्रोल इंधनावरील वाहनांसह ई-वाहनांनाही पसंती मिळत आहे. शहरातील विविध कंपनीच्या दुचाकी वाहनांच्या शोरुम्समधून यंदाच्या दिवाळीत किमान सहा ते सात कोटी रुपयांची उलाढाल होण्याचा अंदाज आहे.
35 हजारांपासून ई बाईक
शहरात दिवाळीमध्ये 35 हजारांत एक व 1 लाखात तीन चायना कंपनीच्या ई बाईक्स विक्रीसाठी आल्या आहेत. एका चार्जींगमध्ये 30 किलोमिटरपर्यंत हे वाहन धावते. चायना कंपन्यांवर नागरिकांचा विश्वास कमी असला तरी ज्यांचे बजेट कमी आहे, असे नागरिक खरेदी करीत आहेत. यासोबतच भारतीय बनावटीच्या 55 हजारांपासून 1 लाख 40 हजार रुपये किमतीपर्यंतच्या ई बाइक्सलाही ग्राहकांची पसंती आहे.
ई बाईक आऊट ऑफ स्टॉक
शहरात नामांकित कंपन्यांचे सात ते आठ शोरुम आहेत. यातील निम्यापेक्षा जास्त शोरुमधील ई बाईक्समधील सर्व ई बाईकची विक्री झाली आहे. तर उर्वरित कंपन्यांच्या वाहने आऊट ऑफ स्टॉक झाली आहेत. मोजक्या काही शोरुमध्ये ई बाईक्स उपलब्ध आहेत. शहरात यंदाच्या दिवाळीत एकूण दुचाकीच्या विक्रीत किमान 100 ते 125 ई बाईक्सची विक्री झाल्याचा अंदाज बजाज पगारिया शोरुमचे व्यवस्थापक योगेश चंदन यांनी दिली.
तीनचाकी रिक्षा, मालवाहू वाहनांची विक्री
शहरात ई रिक्षेला कमी मागणी आहे. तर काही प्रमाणात ई मालवाहू वाहनांना मागणी आहे. शहरात मोजके एक, दोनच कंपन्यांचे शोरुम्स आहेत. मात्र काही व्यवसायीकांनी जळगाव येथूनही तीनचाकी मालवाहू रिक्षांची खरेदी केली आहे. यासोबतच पेट्रोल व डिझेल या इंधनावरील वाहनांनाही मागणी आहे.
झेंडू फुले, पुजासाहित्य, घटला मागणी
शहरात सोमवारी सकाळपासून बाजारात गर्दी होती. झेंडूच्या फुलांची सर्वाधिक विक्री झाली. यंदा फुलांचे दर 60 रुपये किलोपर्यंत होते. माती व पीओपीच्या लक्ष्मीच्या मुर्त्या, लाह्या, बत्तासे आदींसह पुजा साहित्याची विक्री झाली. यासोबतच सोमवारीही बाजारात शोभीवंत वस्तू, गृह सजावटीच्या वस्तू, फुलांचे हार, तोरण आदींना अधिक मागणी आहे. या वस्तूंच्या विक्रीतूनही शहरात मोठी उलाढाल झाली.
