कोकणात राणे-विरोधात राणे संघर्ष : भाजपचे मंत्री नितेश राणे म्हणाले, हमाम में सब नंगे हैं !
मालवण (27 नोव्हेंबर 2025) : कोकणातील मालवण मतदारसंघात निवडणुकीत राणे विरोधात राणे असा संघर्ष पहायला मिळतो आहे तर शिवसेना शिंदे गटाचे आमदार नीलेश राणे यांनी भाजप पदाधिकार्‍याच्या घरात स्टींग करीत 25 लाखांची रोकड जप्त केल्यानंतर अनेक प्रश्न उपस्थित झाले असतानाच भाजपचे मंत्री नितेश राणे यांनीच आपल्या भावाच्या आरोपांवर प्रत्युत्तर देत, हमाम में सब नंगे हैं, अशी टोलेबाजी केली. इतकेच नाही तर नितेश राणे यांनीही भाजप पदाधिकारी विजय किनवडेकर यांच्या घरी भेट दिली.
रक्कम घरात ठेवली तर त्यात चूक काय?
राष्ट्रीय राजकारणात राणे कुटुंबाचा उल्लेख आला की वाद हा अभिन्न भाग असतो. कोकणातील राणे बंधूंमधील मतभेद सर्वश्रुत आहेतच. परंतु या वेळी भावाभावांमधील वाद संपुष्टात येण्याऐवजी अधिकच उफाळून आला आहे. भाजपचे मंत्री नितेश राणे यांनी स्वतःच्या पक्षाचे समर्थन करत तडाखेबाज प्रतिक्रिया दिली. खासगी व्यवसायातून कमाई झालेली रक्कम आपल्याकडे ठेवली तर त्यात चूक काय? फक्त राजकीय चष्म्यातून बघू नका, असे ते म्हणाले. आमच्या विरोधकांनी आमची प्रतिमा मलीन करण्याचा प्रयत्न करू नये. नियम जो आहे तो सर्वांनाच लागू. हमाम में सब नंगे है! अशा शब्दांत त्यांनी भावाच्या स्टिंगवर पलटवार केला. याशिवाय, युतीची चर्चा करण्याची वेळ गेली. प्रक्रियेनुसारच सर्व निर्णय होतात, असे म्हणत त्यांनी भावाच्या युतीविषयी आरोपालाही उत्तर दिले.
राणे विरुद्ध राणे असा राजकीय संग्राम
एका घरात सापडलेल्या पैशामुळे संपूर्ण जिल्हा ढवळून निघाला आहे. प्रचाराची दिशा पूर्णपणे बदलली आहे. राणे विरुद्ध राणे असा राजकीय संग्राम कोकणकार बघत आहेत. भाजपचे प्रदेशाध्यक्ष थेट या वादात अडकले आहेत. शिवसेना शिंदे गटानेही त्यांच्या आमदाराच्या पाठीशी उभं राहत भाजपवर हल्ले चढवले आहेत. दुसरीकडे, विरोधकांनीही भाजपचा पैशाचा खेळ असा ठपका ठेवत सरकारवर धारेवर धरले आहे. निवडणूक जितकी जवळ येतेय तितका मुद्दा धारदार होत चालला आहे.
स्टींगमध्ये भाजपा पदाधिकार्‍याच्या घरात सापडले घबाड
25 नोव्हेंबरच्या रात्री आमदार नीलेश राणे त्यांच्या पथकासह थेट भाजप पदाधिकारी विजय किनवडेकर यांच्या घरात पोहोचले. त्यांच्या मते, तिथे हिरव्या रंगाच्या पिशवीत सुमारे 25 लाखांची बेहिशोबी रोख रक्कम आढळून आली. संपूर्ण प्रकार व्हिडिओमध्ये टिपला गेला वराणेंनी तो प्रसारमाध्यमांना आणि पोलिसांना दिल्याचे सांगितले. या प्रकरणामागे भाजप प्रदेशाध्यक्ष आणि मंत्री रवींद्र चव्हाण यांचा हात असल्याचा थेट आरोप करत, जेव्हा जेव्हा चव्हाण सिंधुदुर्गात येतात, तेव्हा काहीतरी संशयास्पद घडतचं, असा घणाघात केला. मैदानात उतरा, पैशाच्या जोरावर मतं खरेदी करू नका, असा जाहीर संदेशही त्यांनी दिला.
