वरणगावकरांच्या लोकसहभागातून निवडणूक : नगराध्यक्षपदी विजयी होणार ! ; सुनील काळे यांचा विश्वास

वरणगावात आता विकासाचे ट्रॅक्टर चालणार
सुनील काळे म्हणाले की, निवडणूक काळात आता माझ्यावर बिनबुडाचे आरोप होतील मात्र त्याकडे वरणगावकर दुर्लक्ष करतील ही मला खात्री आहे. आपला कोणत्याही समाजाला विरोध नाही कारण शहरातील सर्व समाज चांगलेच आहेत मात्र राजकारण आले की माणूस बदनाम केला जातो, असेही त्यांनी सांगत भाजपाने जात व पैसा पाहून उमेदवारी दिल्याचे सांगत जोरदार टीका केली.

विकासगंगा आणली ही चूक आहे का?
अपक्ष उमेदवार सुनील काळे म्हणाले की, अडीच वर्षांच्या काळात नगराध्यक्ष म्हणून काम करताना मी कधीही जात पाहिली नाही, सर्व जाती-धर्माला घेवून शहराला पुढे नेण्याचा प्रयत्न केला. अडीच वर्षात विकासगंगा शहरात आणली ही माझी चूक आहे का? अनेक वर्षांचा पाण्याचा वनवास संपवला ही चूक आहे का? वरणगावात शिवरायांचा पुतळा बसवला, व्यायामशाळा उभारणी, विद्यार्थ्यांसाठी लायब्ररी सुरू केली, चांगले रस्ते, महात्मा ज्योतीबा फुले यांचे मंगल कार्यालय उभे केले ही चूक आहे का? शहरात विकासकामे केल्यानंतरही आपली उमेदवारी पक्षाने कापल्याने त्यांनी पक्षावर टीका केली.

यांची होती उपस्थिती
व्यासपीठावर भुसावळ पंचायत समितीचे माजी सभापती राजेंद्र गुरचळ, शहराध्यक्ष सुनील माळी, उपाध्यक्ष शामराव धनगर, ज्येष्ठ नेते मनोहर सराफ, अल्लाउद्दीन शेख, बी.के.खाटीक, दत्तूपंत मराठे, सुभाष माळी, मुस्लीम भाई, ईरफानभाई पिंजारी, गोविंदा माळी आदींची उपस्थिती होती.

30 रोजी शक्ती प्रदर्शन व जाहीर सभा
सुनील कळे यांनी सांगितले की, रविवार, 30 रोजी शहरातील छत्रपती पुतळ्याजवळ जाहीर सभा होईल तत्पूर्वी सायंकाळी शक्ती प्रदर्शन रॅली काढण्यात येईल व आपली भूमिका आपण त्यावेळी आणखी स्पष्टपणे मांडू, असेही ते म्हणाले.