भुसावळ शहरातील तीन प्रभागांसाठी आता 20 डिसेंबरला निवडणूक ; समोर आले ‘हे’ कारण
भुसावळ (30 नोव्हेंबर 2025) : भुसावळ नगरपालिकेची रणधुमाळी सुरू असताना निवडणूक आयोगाच्या नव्या आदेशामुळे शहरातील तीन प्रभागांमध्ये आता 20 डिसेंबर रोजी निवडणूक तर 21 डिसेंबर रोजी मतमोजणी होणार आहे. नव्या आदेशामुळे केवळ तीन प्रभागातील निवडणूक लांबली असलीतरी अन्य प्रभागात 2 डिसेंबर रोजी निवडणूक होईल व 3 रोजी मतमोजणी होणार आहे.
उशिराने मिळाला निकाल
नामनिर्देशन दाखल करताना उमेदवारांनी दाखल केलेल्या हरकती फेटाळल्यानंतर त्याविरोधात भुसावळातील तीन उमेदवारांनी न्यायालयात अपिल दाखल केले मात्र 22 नोव्हेंबरपर्यंत निकाल अपेक्षित असताना हा निकाल 25 नंतर आल्यानंतर उमेदवारांना माघारीसाठी अपेक्षित वेळ मिळाला नाही व चिन्ह वाटपाची प्रक्रियाही उरकली गेल्याने अशा ठिकाणासाठी आता सुधारीत निवडणूक कार्यक्रम जाहीर करण्यात आला आहे. असे असलेतरी या प्रभागांमध्ये आता नव्याने कुणालाही नामांकन दाखल करता येणार नाही.
भुसावळातील तीन प्रभागात आता 20 डिसेंबरला रोजी निवडणूक
भुसावळ शहरातील प्रभाग चार ब, पाच ब व 11 ब या तीन प्रभागांमध्ये 20 डिसेंबर रोजी सकाळी साडेसात ते साडेपाच दरम्यान निवडणूक होईल तसेच 21 रोजी सकाळी 10 वाजता मतमोजणीला सुरूवात होईल. तत्पूर्वी 4 रोजी जिल्हाधिकारी निवडणूक कार्यक्रम जाहीर करतील तसेच 10 डिसेंबर रोजी दुपारी तीन पर्यंत नामांकन मागे घेता येईल.
तीन उमेदवारांनी दाखल केल्या होत्या याचिका
पालिका निवडणुकीत उमेदवारी अर्ज छाननीत उमेदवारांनी एकमेकांच्या अर्जावर हरकती घेतल्या होत्या. त्यावर निवडणूक निर्णय अधिकारी जितेंद्र पाटील यांनी निकाल दिला मात्र या निकालाविरूद्ध मेघा वाणी, वर्षा तावडे, परीक्षीत बहाटे या उमेदवारांनी न्यायालयात अपिल दाखल केले व न्यायालयाने अपीलकर्त्यांचे म्हणणे ऐकून घेत गत मंगळवारी निवडणूक अधिकार्यांचा निर्णय कायम ठेवला होता.
या उमेदवारांबाबत अपिल
मेघा वाणी यांनी भावना पाटील यांचा अर्ज अपूर्ण असल्याची हरकत घेतली होती पण अर्ज परिपूर्ण असल्याचे सांगत निवडणूक निर्णय अधिकार्यांनी वाणी यांची हरकत निकाली काढली होती. त्याविरुद्ध वाणी न्यायालयात गेल्या होत्या.
उमेदवार वर्षा तायडे यांच्या अर्जासोबत खर्चविषयक हमीपत्र जोडले नसल्याने त्यांचा अर्ज निवडणूक निर्णय अधिकार्यांनी अवैध ठरवल्याने तायडे न्यायालयात गेल्या होत्या. न्यायालयाने निवडणूक निर्णय अधिकार्यांचा निर्णय कायम ठेवला.
उमेदवार परीक्षीत बर्‍हाटे यांनी अशोक चौधरी यांचा अपक्ष म्हणून असलेला अर्ज पात्रता पूर्ण करत नाही. तो अवैध घोषित करावा, अशी मागणी केली होती.
