तिजोरीच्या वक्तव्यावरून अजित पवारांची सारवा-सारव ; म्हणाले तिजोरी तर जनतेची !
पुणे (30 नोव्हेंबर 2025) : उपमुख्यमंत्री अजित पवार यांच्या तिजोरीच्या वक्त्यावर सर्वदूर टीकेची झोड उठताच त्यांनी आता सारवासारव केली आहे. ते विधान मी ओघात बोललो होतो. तिजोरी माझ्या किंवा कुणाच्या बापाची नाही, ती जनतेची आहे. तसेच माझ्यापेक्षा जास्त अधिकार हे मुख्यमंत्र्यांनाच आहेत, असे स्पष्टीकरण अजित पवार यांनी दिले.
उपमुख्यमंत्री अजित पवार यांनी एका सभेत बोलताना तुम्ही राष्ट्रवादीच्या उमेदवारांना मतदान करा, तुमच्या भागाला निधी कमी पडू देणार नाही. तुमच्या हातात मत आहे, तर माझ्या हातात निधी आहे, असे वक्तव्य केले होते. त्यांच्या या वक्तव्यानंतर राष्ट्रवादीच्या पदाधिकार्‍यांनीही अजित पवारांच्या हातात राज्याच्या तिजोरीच्या चाव्या आहेत त्यामुळे राष्ट्रवादीला मतदान केल्यास निधी मिळेल, असे म्हटले होते. यावरून भाजप नेत्यांनी अजित पवार यांच्यावर निशाणा साधला होता. आता अजित पवारांनी आपल्या वक्तव्यावर सारवासारव केली आहे.
नेमके काय म्हणाले अजित पवार?
भोर नगरपालिका निवडणूक प्रचारानिमित्त उपमुख्यमंत्री अजित पवार यांची नुकतीच जाहीर सभा पडली. या सभेत बोलताना त्यांनी तिजोरीच्या चाव्यावरील विधानावर स्पष्टीकरण दिले. मी परवा बोलताना म्हणालो होतो की चाव्या माझ्याकडे आहेत, पण तो केवळ बोलण्याचा एक भाग होता. लगेच काहींनी (भाजप नेत्यांनी) आठवण करून दिली की चावी तुमच्याकडे असली तरी तिजोरी आमच्या खोलीत आहे. अरे, पण कोणाच्याही खोलीत तिजोरी असू द्या, तिजोरी ही जनतेची आहे. ती माझ्या किंवा इतर कुणाच्या बापाची नाही, हे सत्य आहे, असे अजित पवार म्हणाले.
