पालिका निवडणूक : आज रात्री प्रचार तोफा थंडावणार : उद्या मतदानाच्या दिवशी जाहिरात प्रसिद्धीला बंदी
भुसावळ (1 डिसेंबर 2025) : पालिका निवडणुकांसाठी आदर्श आचारसंहिता सुरू असून मंगळवार, 2 रोजी निवडणूक होत आहे तर 3 रोजी निकाल समोर येणार आहे. राज्य निवडणूक आयोगाने 1 डिसेंबर रोजी रात्री 10 वाजेपर्यंत प्रचाराची मुभा दिली असून मतदानाच्या दिवशी मंगळवार, 2 डिसेंबर रोजी इलेक्ट्रॉनिक तसेच समाजमाध्यमांवर प्रचाराच्या जाहिराती प्रसिद्ध अथवा प्रसारित करण्यास सक्त मनाई केली आहे.
राज्यातील नगरपरिषद व नगरपंचायत निवडणुकांसाठी 2 डिसेंबर रोजी मतदान होत आहे. ‘महाराष्ट्र नगरपरिषद, नगरपंचायत व औद्योगिक नगरी अधिनियम 1965’ मधील तरतुदीनुसार 1 डिसेंबर रात्री 10 नंतर प्रचारसभा, रॅली, ध्वनिक्षेपक वापर, प्रचारफेर्या वा इतर कोणत्याही प्रकारचा जाहीर प्रचार करता येणार नाही.
राज्य निवडणूक आयोगाने 9 ऑक्टोबर 2025 रोजी जारी केलेल्या ‘प्रसारमाध्यम संनियंत्रण व जाहिरात प्रामाणन आदेश 2025’ मधील भाग आठच्या परिच्छेद 16 नुसार मतदानाच्या दिवशी मुद्रित, इलेक्ट्रॉनिक तसेच सोशल मिडिया या सर्व माध्यमांत प्रचाराच्या जाहिरातींवर संपूर्ण बंदी लागू राहील, असेही प्रसिद्धिपत्रकात नमूद आहे.
मतदानाच्या पारदर्शकता आणि शांततेसाठी ही नियमावली अत्यंत महत्त्वाची आहे. सर्व राजकीय पक्ष, उमेदवार तसेच माध्यमांनी याची काटेकोरपणे अंमलबजावणी करावी, असे राज्य निवडणूक आयोगाने कळवले आहे.
