50 हजारांची लाच भोवली : अमळनेर तालुक्यातील लाचखोर ग्रामपंचायत अधिकारी जळगाव एसीबीच्या जाळ्यात

गणेश वाघ
भुसावळ (30 एप्रिल 2026) : बारा लाख रुपयांचे बिल मंजूर केल्याच्या मोबदल्यात सात टक्के प्रमाणे एकूण 84 हजार रुपयांची लाच मागून तडजोडीअंती 50 हजारांची लाचा स्वीकारताना अमळनेर तालुक्यातील नगाव बुद्रुक येथील ग्रामपंचायत येथील ग्राम विकास अधिकारी रवींद्र देविदास पवार (48) यांना जळगाव एसीबीने गुरुवारी सायंकाळी राहत्या घरातून अटक केल्याने लाचखोर प्रचंड हादरले आहेत.

असे आहे लाच प्रकरण
तक्रारदाराच्या नातलगाला पंधराव्या वित्त आयोगाच्या निधीतून नगाव बुद्रुक येथे सिमेंट काँक्रीट गटार बांधकाम आणि पेव्हर ब्लॉक बसविण्याची दोन स्वतंत्र कामे मंजूर झाली होती. या दोन्ही कामांची एकत्रीत अंदाजित किंमत सुमारे 12 लाख रुपये इतकी होती. ही कामे पूर्ण करून त्यांची बिले मंजूर करून देण्यासाठी ग्रामविकास अधिकारी पवार यांच्याकडून तक्रारदाराकडे एकूण कामाच्या रकमेच्या सुमारे 7 टक्के प्रमाणे 84 हजारांची मागणी केली मात्र तक्रारदाराने आर्थिक अडचणी दर्शविल्यानंतर दोघांमध्ये तडजोड होऊन 50 हजार रुपये देण्याचे ठरले.