Massive Fire at Two Companies in Jalgaon MIDC जळगाव (2 मे 2026) : शहरातील एमआयडीसीच्या ‘जे’ सेक्टरमधील दोन नामांकित कंपन्यांना शनिवारी दुपारी भीषण आग लागली. आगीनंतर या परिसरात प्रचंड मोठी खळबळ उडाली. आगीचे स्वरूप इतके रौद्र होते की, संपूर्ण शहरातून धुराचे लोट पाहायला मिळत होते. दरम्यान, या घटनेची माहिती मिळताच आमदार राजूमामा भोळे यांनी तात्काळ घटनास्थळी भेट देऊन पाहणी केली
जळगावात भीषण आग
मिळालेल्या माहितीनुसार, एमआयडीसीमधील ‘जे’ सेक्टरमध्ये असलेल्या ‘जे ब्रदर्स’ आणि ‘श्री एंटरप्रायझेस’ या दोन कंपन्यांना दुपारी दोनच्या सुमारास अचानक आग लागली. जे ब्रदर्स कंपनीत खोबरेल तेल आणि इतर सुगंधी तेलांचे पॅकिंग केले जाते, तर शेजारील श्री एंटरप्रायझेसमध्ये प्लास्टिकच्या चटई तयार करण्याचे काम चालते. या दोन्ही कंपन्यांमध्ये ज्वलनशील पदार्थांचा मोठा साठा असल्याने काही मिनिटांतच आगीने भीषण रूप धारण केले.
आग लागल्यानंतर कंपन्यांमधून मोठमोठे स्फोटांचे आवाज येत होते. तेलाचे डबे व रसायनांच्या पिंपांमुळे हे स्फोट होत असल्याचा प्राथमिक अंदाज आहे. या स्फोटांमुळे परिसरातील नागरिकांमध्ये भीतीचे वातावरण निर्माण झाले.
युद्धपातळीवर अग्निशमन दलाचे प्रयत्न
घटनेची माहिती मिळताच एमआयडीसी पोलीस ठाण्याचे अधिकारी व कर्मचारी तसेच अग्निशमन दलाचे पथक तातडीने घटनास्थळी दाखल झाले. आगीवर नियंत्रण मिळवण्यासाठी युद्धपातळीवर प्रयत्न सुरू असून आतापर्यंत अग्निशमन दलाचे सहा बंब पाण्याने रिकामे करण्यात आले आहेत. आगीची तीव्रता लक्षात घेता समोर असलेल्या भारत गॅस गोदामातूनही पाण्याचा पुरवठा सुरू करण्यात आला आहे. आगीचे नेमके कारण अद्याप समजू शकले नसून सुदैवाने जीवितहानीची कोणतीही माहिती समोर आलेली नाही. मात्र, दोन्ही कंपन्यांचे मोठ्या प्रमाणात आर्थिक नुकसान झाल्याचा अंदाज आहे.
आमदारांची घटनास्थळी धाव
आगीची भीषणता आणि एमआयडीसी परिसरातील परिस्थितीची माहिती मिळताच जळगावचे आमदार राजूमामा भोळे यांनी तातडीने घटनास्थळी धाव घेतली. त्यांनी प्रत्यक्ष जळणार्या कारखान्यांची आणि सुरू असलेल्या मदतकार्याची पाहणी केली. आमदार भोळे यांनी अग्निशमन दल आणि पोलीस प्रशासनाशी चर्चा करून आग लवकरात लवकर आटोक्यात आणण्यासाठी सर्वतोपरी प्रयत्न करण्याच्या सूचना देत नुकसानग्रस्त उद्योजकांना धीर दिला.
