मुंबई (मंगळवार, 14 जुलै 2026) : हवामान विभागाने येत्या 20 जुलैपासून राज्यात पुन्हा मुसळधार पावसाचे पुनरागमन होईल, असा दिलासादायक अंदाज वर्तवला आहे. सध्या मान्सूनची लाट कमकुवत झाली असून, पश्चिमेकडून कोरडे वारे वाहत असल्यामुळे आर्द्रतायुक्त वार्यांना चालना मिळत नाहीये. यामुळे मुसळधार पावसाचे ढग गायब झाले आहेत.
अपेक्षित पाऊस न झाल्याने दुबार पेरणीचे संकट
संपूर्ण राज्यात सुरुवातीला दमदार हजेरी लावल्यानंतर आता मान्सूनने विश्रांती घेतली आहे. सध्या महाराष्ट्रात कोरडे वातावरण निर्माण झाले असून तापमानातही वाढ होऊ लागली आहे. जुलै महिना अर्धा संपत आला तरी अनेक जिल्ह्यांत अपेक्षित पाऊस न झाल्याने शेतकरी दुबार पेरणीच्या संकटात सापडण्याची शक्यता आहे.
पुढील पाच दिवस पाऊस नाही
हवामान विभागानुसार, गेल्या आठवड्यात बंगालच्या उपसागरात तयार झालेला कमी दाबाचा पट्टा अरबी समुद्रावर येऊन विरून गेला, त्यामुळे पावसाचा जोर कमी झाला आहे. काही दिवसांपूर्वी घाटमाथ्यावर 500 ते 600 मिलिमीटर कोसळणारा पाऊस आता थेट शून्यावर आला आहे. भारतीय हवामान विभागाने स्पष्ट केले की, हवामान प्रणाली कमकुवत झाल्याने किमान पुढील पाच दिवस राज्यात पावसाची शक्यता नाही.
पाऊस पुन्हा कधी कोसळणार?
हवामान तज्ज्ञांच्या अंदाजानुसार, बंगालच्या उपसागरात पुन्हा एकदा नवीन हवामान प्रणाली सक्रिय होण्याची शक्यता आहे. यामुळे पावसाचे वेळापत्रक खालीलप्रमाणे असेल
16 जुलै : विदर्भातील काही जिल्ह्यांमध्ये मुसळधार पावसाला सुरुवात होण्याची शक्यता आहे.
17 जुलै : अरबी समुद्रातील पश्चिमेकडील वारे बळकट झाल्याने महाराष्ट्रात कोकण आणि घाटमाथ्याच्या परिसरात पाऊस पुन्हा सक्रिय होईल.
20 जुलै : 20 जुलैपासून मुंबई आणि पुण्यासह राज्यातील अनेक भागांमध्ये व्यापक आणि मुसळधार पाऊस कोसळण्याची शक्यता आहे, ज्यामुळे पेरणीच्या कामांना गती मिळू शकेल.
