रोटरी क्लब ताप्ती व्हॅलीतर्फे पाच हजार विद्यार्थ्यांची प्राणीमित्र चित्रकला स्पर्धा

भुसावळ (रविवार, 1 नोव्हेंबर 2026) : रोटरी क्लब ऑफ भुसावळ ताप्ती व्हॅलीतर्फे जागतिक प्राणी दिनानिमित्त भुसावळ परिसरातील सात शाळांमधील सुमारे पाच हजार विद्यार्थ्यांसाठी ‘प्राणीमित्र’ चित्रकला स्पर्धेचे आयोजन करण्यात आले. विद्यार्थ्यांमध्ये प्राणीमात्रांविषयी प्रेम, करुणा आणि संवेदनशीलता निर्माण करणे, निसर्ग व पर्यावरणाबद्दल जाणीव जागृत करणे तसेच विद्यार्थ्यांमधील सुप्त कलागुणांना व्यासपीठ उपलब्ध करून देणे हा या स्पर्धेचा मुख्य उद्देश होता.

विद्यार्थ्यांचा उत्स्फूर्त प्रतिसाद
या स्पर्धेला विद्यार्थ्यांचा उत्स्फूर्त प्रतिसाद मिळाला. चित्र काढताना विद्यार्थ्यांनी मोठ्या आनंदाने आणि कल्पकतेने सहभाग घेतला. काही विद्यार्थ्यांनी आपल्या चित्रातील खारुताईला चक्क मेकअप करून तिचे आकर्षक चित्र साकारले. शाळांमध्ये विद्यार्थ्यांशी संवाद साधताना अनेक विद्यार्थ्यांनी अशा स्पर्धा वारंवार आयोजित करण्याची इच्छा व्यक्त केली. यामुळे विद्यार्थ्यांच्या कलागुणांना वाव देण्यासाठी अशा उपक्रमांची आवश्यकता अधोरेखित झाली. स्पर्धेतील 63 गुणवंत विद्यार्थ्यांना मान्यवरांच्या हस्ते ट्रॉफी आणि प्रमाणपत्र देऊन गौरविण्यात आले.

यांची होती उपस्थिती
अध्यक्षस्थानी डिस्ट्रिक्ट गव्हर्नर इलेक्ट रोटेरियन किशोर राठी होते, तर प्रमुख पाहुणे म्हणून माजी प्रांतपाल रोटेरियन राजीव शर्मा उपस्थित होते. असिस्टंट गव्हर्नर रोटेरियन हरविंदर सिंह थेठी यांच्यासह भुसावळमधील विविध रोटरी क्लबचे पदाधिकारी उपस्थित होते. यावेळी रोटरी क्लब ताप्ती व्हॅलीचे मानद सचिव सुधाकर सनसे यांनी गेल्या चार महिन्यांत क्लबतर्फे राबविण्यात आलेल्या विविध सामाजिक उपक्रमांचा आढावा सादर केला. यामध्ये विज्ञान कार्यशाळा, आर्थिक साक्षरता उपक्रम, मोतीबिंदू तपासणी शिबिर, रक्तदान शिबिर तसेच ग्रामीण शाळांमधील विद्यार्थ्यांसाठी शैक्षणिक साहित्य, स्वच्छतेसाठी वॉश बेसिन आणि वर्गखोल्यांसाठी पंख्यांची व्यवस्था अशा विविध उपक्रमांचा समावेश होता.

अधिकाधिक सदस्यांनी सहभागी व्हावे
क्लबचे अध्यक्ष रोटेरियन विवेक जोशी यांनी आपल्या मनोगतात क्लबच्या पुढील वाटचालीचा संकल्प व्यक्त केला. समाजातील विविध घटकांपर्यंत सेवा पोहोचविण्यासाठी अधिकाधिक सदस्यांना सहभागी करून घेणे, नवीन नेतृत्व घडविणे आणि समाजोपयोगी उपक्रमांची व्याप्ती वाढविणे यावर त्यांनी भर दिला.

यशस्वीतेसाठी यांचे परिश्रम
यशस्वीतेसाठी प्रोजेक्ट चेअरमन कुणाल गालफाडे, हेमंत सनसे, अजय मिसार, परेश शाह, सुधीर शर्मा, अनिल सिसोदिया यांनी विशेष परिश्रम घेतले. क्लबच्या सर्व सदस्यांच्या सहकार्याने कार्यक्रमाचे नियोजन आणि आयोजन अत्यंत उत्साहपूर्ण वातावरणात यशस्वीरीत्या पार पडले.

विद्यार्थ्यांच्या कलागुणांना प्रोत्साहन देतानाच त्यांच्यामध्ये प्राणीप्रेम, निसर्गसंवर्धन आणि सामाजिक संवेदनशीलतेची बीजे रुजविण्याचा रोटरी क्लब ताप्ती व्हॅलीचा हा उपक्रम उपस्थित मान्यवर, पालक आणि शिक्षकांकडून विशेष कौतुकास पात्र ठरला.