भुसावळात महामार्ग चौपदरीकरण कामात धुळीमुळे वाहनधारक त्रस्त

धुराळा न उडण्यासाठी पाण्याचा वापर करून दबाईची शिवसेना शहरप्रमुख बबलू बर्‍हाटे यांची मागणी

भुसावळ : शहर तसेच परीसरात मुंबई-नागपूर राष्ट्रीय महामार्गाच्या चौपदरीकरणादरम्यान वांजोळा रोड व अयोध्या नगरजवळ उड्डाणपुलाचे व बोगद्याचे काम प्रगतीपथावर आहे. दळण-वळणासाठी मातीचा कच्चा रस्ता बनवण्यात आला आहे. याचा परीणाम वातावरणावर होत असून धुळीचे प्रमाण वाढले आहे. रात्री अंधारात डोळ्यात धूळ गेल्याने एका पाठोपाठ चालणारी वाहने दिसेनाशी होऊन अंदाज येत नसल्यामुळे अपघात होत आहेत. दुचाकीवरून प्रवास करणार्‍यांना तर हा मार्ग खडतर झाला आहे. धुराळा उडू नये म्हणून रस्त्यावर रोज पाण्याचा वापर करूनच दबाई करण्याची मागणी शिवसेनेतर्फे शहरप्रमुख बबलू बर्‍हाटे यांनी महामार्ग विभाग प्रकल्पप्रमुख चंद्रमोहन सिन्हा यांच्याकडे केली आहे.

धुळीमुळे वाहनधारकांना मनस्ताप
जड वाहनांमुळे दिवसभर रस्त्याच्या कडेला असणार्‍या घरात धूळ घुसत आहे त्यामुळे घरातील उपकरणे, सोफा, दिवाण आदी साहित्य खराब होत आहे. धुळीचे कण नाका-तोंडात जाऊन सर्दी, खोकला व घसा दुखण्याच्या त्रास सुरू झाला आहे. धुळीमुळे दमा, अस्थमाच्या रुग्णास जास्त त्रास होतो. मुलांची श्वसनक्षमता कमी होते. वारंवार धुळीत राहिल्याने फुप्फुसाची हवेतील ऑक्सिजन शोषून घेण्याची क्षमता कमी होऊ शकते. तसेच लहान मुले व वृद्ध यांच्या आरोग्यावर परिणाम होत आहे. कोरोना काळात हे धोकादायक ठरू शकते.