भुसावळ हत्यांकाड : तिघा आरोपींना 24 पर्यंत न्यायालयीन कोठडी

ओळख परेडसाठी पोलिसांनी राखला हक्क : गुन्ह्यात अ‍ॅट्रासिटी कलम वाढवले

भुसावळ : भुसावळचे नगरसेवक रवींद्र उर्फ हम्प्या खरात यांच्यासह त्यांची दोन्ही मुले व मोठ्या बंधूंसह अन्य एकावर कट रचून आलेल्या आरोपींनी अंधाधुंद गोळीबार तसेच चॉपरसह दगडाने हल्ला करून खून केल्याची घटना रविवार, 6 ऑक्टोबर रोजी रात्री सव्वा नऊ ते साडेनऊ वाजेच्या सुमारास घडली होती. या घटनेने भुसावळसह राज्यात मोठी खळबळ उडाली होती. या प्रकरणी शेखर हिरालाल मोघे उर्फ बॉक्सर (सात नंबर पोलिस चौकीजवळ, भुसावळ), मोहसीन अजगर खान उर्फ राज बॉक्सर (21, कवाडे नगर, भुसावळ) व मयुरेश रमेश सुरवाडे (20, आंबेडकर नगर, भुसावळ) या आरोपींना अटक करण्यात आली होती. अटकेतील आरोपींना मंगळवारी सकाळी 10.30 प्रचंड बंदोबस्तात भुसावळ अतिरीक्त सत्र न्यायालयात न्या.डी.एम.शिंदे यांच्या न्यायासनापुढे हजर केल्यानंतर त्यांना 14 पर्यंत पोलिस कोठडी सुनावण्यात आली होती. पोलिस कोठडी संपल्याने प्रचंड बंदोबस्तात आरोपींना सोमवारी भुसावळ अतिरीक्त सत्र न्यायालयात हजर केले असता पोलिस कोठडीचा हक्का राखून 24 पर्यंत न्यायालयीन कोठडी सुनावण्यात आली. दरम्यान, या गुन्ह्यातील आरोपींविरुद्ध अ‍ॅट्रासिटीचा कलम वाढवण्यात आले आहे.

न्यायालयाला छावणीचे स्वरूप
आरोपींना भुसावळ न्यायालयात हजर करण्यापूर्वी न्यायालय परीसरात प्रचंड पोलिस बंदोबस्त लावण्यात आला होता. पोलिस उपअधीक्षक गजानन राठोड, बाजारपेठचे निरीक्षक दिलीप भागवत, शहरचे बाबासाहेब ठोंबे यांच्यासह आरसीपी तुकडी, डीबी कर्मचार्‍यांसह होमगार्ड कर्मचार्‍यांचा कडेकोट बंदोबस्त लावण्यात येवून गर्दी पांगवण्यात आली.

हत्याकांडानंतर हादरले भुसावळ
अटकेतील तीनही आरोपींनी सुरुवातीला लाल चर्चजवळ रोहित उर्फ सोनू, मुलगा प्रेमसागर तसेच मित्र सुमित संजय गजरे यांच्यावर हल्ला चढवला तसेच गोळीबार व चॉपरने हल्ला चढवून तिघांचा खून केला होता. खरातांच्या मुलांना संपवल्याने ‘हम्प्या’ आपल्याला जिवंत ठेवणार नाही ही खुणगाठ बांधूनच तिघांही आरोपींनी स्कुटीने समता नगर गाठले. याचवेळी नवरात्रोत्सवानिमित्त दांडीया सुरू असताना खरातांना भुसावळात गोळीबार झाल्याचे समजले, मात्र ते बेसावध होवून घराबाहेर बसले असतानाच आरोपींनी त्यांच्यावर हल्ला चढवत अंदाधूंद गोळीबार केला व त्याचवेळी आरोपींनी खरातांवर चॉपरने हल्ला चढवल्याने रक्तबंबाळ अवस्थेत ते पवारांच्या घरात आश्रयाला गेले व त्याचवेळी आरोपींनी दरवाजावरून खरातांवर चाकू तसेच चॉपरचे सपासप वार केले तर त्याचवेळी त्यांचे बंधू सुनीलदेखील समोर आल्याने त्यांच्या मानेवर वार करताच अतिरक्तस्त्राव झाल्याने त्यांचाही मृत्यू ओढवला. यावेळी खरातांची बहिण अलका खरात यादेखील धावून आल्या मात्र आरोपींनी त्यांनाही जिवंत ठार मारण्याची धमकी दिली मात्र त्या घटनास्थळावरून बाजूला गेल्याने सुदैवाने त्या बचावल्या.

पोलिस कोठडीचा हक्क राखून आरोपींना न्यायालयीन कोठडी
खरात हत्याकांडप्रकरणी अटकेतील आरोपी शेखर हिरालाल मोघे उर्फ बॉक्सर (सात नंबर पोलिस चौकीजवळ, भुसावळ), मोहसीन अजगर खान उर्फ राज बॉक्सर (21, कवाडे नगर, भुसावळ) व मयुरेश रमेश सुरवाडे (20, आंबेडकर नगर, भुसावळ) हे जळगाव स्थानिक गुन्हे शाखेला शरण आल्याने त्यांना अटक करण्यात आली होती. आरोपींची 14 रोजी पोलिस कोठडी संपल्यानंतर त्यांना प्रचंड बंदोबस्तात भुसावळ अतिरीक्त सत्र न्यायालयात हजर करण्यात आले. आरोपींविरुद्ध या गुन्ह्यात अ‍ॅट्रासिटीचे कलम वाढवण्यात आल्याने त्यांना न्या.एस.पी.डोरले यांच्या न्यायासनापुढे हजर केले असता सरकारी वकील अ‍ॅड.विजय खडसे यांनी आरोपींची ओळख परेड करावयाची असल्याने पोलिस कोठडीचा हक्क राखून न्यायालयीन कोठडी सुनावण्याची मागणी केली. ती न्या.डोरले यांनी मान्य केली. प्रसंगी तपासाधिकारी तथा उपअधीक्षक गजानन राठोड उपस्थित होते. दरम्यान, समता नगर परीसरात पोलिसांनी आरसीपीसह जिल्ह्यावरून कुमक मागवून बंदोबस्त वाढवला आहे.

टीप देणारा चौथा आरोपी कोठडीत
खरात भावंडे घराबाहेर पडल्याची टीप आरोपींना देणार्‍या आकाश उर्फ सुकदेव सोनवणे (19, सुरवाडे नगर, भुसावळ) यास अटक केल्यानंतर आरोपीला न्यायालयाला 16 पर्यंत पोलिस कोठडी सुनावली होती. आरोपी सध्या पोलिस कोठडी असून त्याचीदेखील चौकशी असून कोठडी संपल्यानंतर त्यास पुन्हा भुसावळ अतिरीक्त सत्र न्यायालयात हजर केले जाणार असल्याचे सूत्रांनी सांगितले.