यावल शहर व पोलीस ठाणे हद्दीतील 57 गावात 93 सार्वजनिक गणेशोत्सव मंडळाकडून उद्या श्रींची स्थापना

यावल (रविवार, 13 सप्टेंबर 2026) : यावल शहरात 21 तर ग्रामीण भागात यावल पोलीस ठाण्याच्या हद्दीतील 57 गावात 72 मिळून एकूण 93 सार्वजनिक गणेशोत्सव मंडळांकडून सोमवार, 14 श्रींची उत्साहात स्थापना केली जात आहे. शहरात पाच दिवसांचा तर विविध गावात 6, 9 व 11 दिवसांचा गणेशोत्सव साजरा केला जात आहे. शहरात गेल्या चार दिवसांपासून मोठ्या उत्साहात गणेश मूर्तींचे आगमन झाले तरी रविवारी रिप-रिप पावसातही मंडळाचे पदाधिकारी, कार्यकर्ते हे सजावट करताना दिसून आले.

72 मंडळांकडून श्रींची होणार स्थापना
शहरात व ग्रामीण भागात श्रींची स्थापनेची तयारी पूर्ण झाली आहे. सोमवारी दुपारनंतर स्थापना करण्यात येणार आहे. या करीता यावल शहरात एक खाजगी तर 20 सार्वजनिक तसेच पोलीस ठाण्याच्या हद्दीत येणार्‍या ग्रामीण भागातील 57 गावात एकूण 72 सार्वजनिक गणेशोत्सव मंडळाकडून उत्सव साजरा करण्यात येत आहे. यावल तालुक्यात गणेशोत्सव साजरा करण्याच्या चार पध्दती आहेत. यामध्ये शहरातील गणेशोत्सव पाच दिवसांचा असतो तर काही गावात सहा दिवस, नऊ दिवस व दहा दिवस अशा पध्दतीने गणेशोत्सव साजरा करण्यात येतो. यात तालुक्यातील यावल शहरासह साकळी, किनगाव, नायगाव, कोरपावली व दहिगाव ही संवेदनाक्षम गावे आहेत.