नाशिक पोलिस आयुक्त दीपक पांडे यांच्या ‘भोंग्याबाबतच्या’ घेतलेल्या या निर्णयाची सर्वत्र चर्चा
नाशिक : नाशिक पोलिस आयुक्त दीपक पांडे यांनी भोंग्यांबाबत आदेश जारी केले असून या आदेशानुसार सर्व धार्मिक स्थळांना भोंग्यासाठी परवानगी घेणे बंधनकारक असणार आहे. दरम्यान, मनसे अध्यक्ष राज ठाकरे यांनी मशिदीवरील भोंग्यांचा मुद्दा उपस्थित केल्याने त्यावरून राजकारण तापले असून 3 मे पर्यंत मशिदीवरील भोंगे उतरण्याचा अल्टिमेटम राज ठाकरे यांनी सरकारला दिला आहे. त्यातच सोमवार, 18 रोजी गृह विभागाकडून बैठकीचे आयोजन करण्यात आले आहे. पोलिस महासंचालकांच्या उपस्थितीत होत असलेल्या या बैठकीत मोठा निर्णय होण्याची शक्यता वर्तवली जात आहे.
धार्मिक स्थळांना आता भोंग्यासाठी लागणार परवानगी
सर्व धार्मिक स्थळांना भोंग्यांसाठी परवानगी घ्यावी लागणार आहे. धार्मिक स्थळांनी 3 मे पर्यंत भोंग्यांसाठी परवानगी घ्यावी, असे आदेश नाशिक पोलिस आयुक्त दीपक पांडे यांनी दिले आहेत. आदेशानुसार परवानगी न घेतलेल्या संबंधित अनधिकृत भोंग्यांवर कारवाई केली जाणार, असेही आदेशात स्पष्ट करण्यात आलं आहे.
या आदेशाचे पालन न केल्यास कारवाई
कुठल्याही मशिदीच्या 100 मीटर परीसरात हनुमान चालिसा म्हणण्यास मनाई करण्यात आली आहे, असे पोलिस आयुक्तांनी आदेशात म्हटले आहे. यासोबतच अजानच्या वेळी हनुमान चालीसा लावता येणार नाही. मशिदीत अजान होण्याच्या 15 मिनिटे आधी हनुमान चालिसा लावता येईल, असे पोलिस आयुक्तांनी आदेशात म्हटले आहे. धार्मिक स्थळांवर कोण्याही कार्यक्रमासाठी भोंगे लावायचे असल्यास परवानगी आवश्यक आहे, असे आदेशात नमूद करण्यात आले आहे. आदेशाचे पालन न करणार्‍यांविरोधात गुन्हा दाखल करून कायदेशीर कारवाई करण्यात येईल, असे पोलिस आयुक्त दीपक पांडे यांनी सांगितले.
