High profile thief escapes by plane while burglary in Jalgaon LCB’s net जळगाव : राज्यभरात तब्बल 40 पेक्षा अधिक गुन्हे दाखल असलेल्या अट्टल घरफोड्याच्या जळगाव गुन्हे शाखेने मुसक्या आवळल्या आहेत. जिम्मी उर्फ दिपक विपीन शर्मा (29, रा.गुरुकुल नगर, नंदुरबारत्र असे अटक करण्यात आलेल्या आरोपीचे नाव आहे. अवघ्या तीन मिनिटात घरफोडी करुन लागलीच विमानाने पलायन करण्यात आरोपी माहिर आहे. आरोपीने चोपडासह अमळनेर येथील घरफोड्यांची कबुली दिली आहे तर आणखी काही गुन्हे उघडकीस येण्याची शक्यता आहे.
उदळीतील ग्रामीण पतसंस्थेला 12 लाखांचा चुना : त्रिकूटाविरोधात गुन्हा
गोपनीय माहितीवरून कारवाई
चोपडा व अमळनेर या दोन शहरात 30 जून रोजी मोठ्या घरफोड्या झाल्या होत्या. या घरफोड्यांचा तपास स्थानिक गुन्हे शाखेचे निरीक्षक किरणकुमार बकाले व सहकारी समांतर करीत होते. त्यासाठी पथकाचे गटण करण्यात आले. त्यात सहायक फौजदार रवी नरवाडे, पोहेकॉ संजय हिवरकर, राजेश मेढे, संदिप पाटील, प्रविण मांडोळे, परेश महाजन, मुरलीधर बारी आदींचा समावेश होता.
गोपनीय माहितीवरून जिम्मी जाळ्यात
चोपडा व अमळनेर शहरात दिवसा झालेल्या घरफोड्या करण्याची पध्दत समान असल्याचे पो.नि. किरणकुमार बकाले यांच्या लक्षात आले. तांत्रीक माहिती व गोपनीय माहितीच्या आधारे जिम्मी शर्मा हा नंदुरबार पोलिसांच्या अभिलेख्यावरील गुन्हेगार या घटनांमागे असल्याचे त्यांना समजले. या माहितीच्या आधारे आपल्या सहका-यांच्या मदतीने जिम्मी शर्मा यास शिताफीने ताब्यात घेत चौकशी करण्यात आली. पोलिसी खाक्या दाखवल्यानंतर त्याने चोपडा व अमळनेर येथील घरफोड्या केल्याचे कबुल केले आहे. चोपडा शहरातील दोन व अमळनेर येथील एक असे घरफोडीचे तिन गुन्हे उघडकीस आले आहेत.
राज्यभरात 40 वर गुन्हे
अटकेतील जिम्मी शर्मा याच्याकडून अजून काही गुन्हे उघडकीस येण्याची शक्यता वर्तवली जात आहे. घरफोडीच्या रकमेतून दिल्ली, हरयाणा, राजस्थान, गुजरात असा विमान प्रवास करणा-या जिम्मी शर्मा याच्यावर विविध राज्यात सुमारे तीस ते चाळीस गुन्हे दाखल आहेत.
भुसावळात कत्तलीपूर्वीच आठ गुरांची सुटका : दोघांना अटक
