राष्ट्रवादी काँग्रेसच्या अध्यक्षपदावरुन निवृत्तीची शरद पवार यांची घोषणा

पवार काय म्हणाले?
1999 मध्ये राष्ट्रवादी काँग्रेस पक्षाची स्थापना झाली तेव्हापासून गेली 24 वर्षे राष्ट्रवादी पक्षाचा अध्यक्ष म्हणून काम पाहत आहे. सार्वजनिक जीवनातील 1 मे 1960 पासून सुरू झालेला हा संपूर्ण प्रवास गेली 63 वर्षे अविरत चालू आहे. त्यापैकी 56 वर्षे मी कुठल्या ना कुठल्या सभागृहाचा सदस्य किंवा मंत्री म्हणून सातत्याने काम करत आहे. संसदेतील राज्यसभा सदस्यपदाची पुढील 3 वर्षे शिल्लक आहेत. या काळात राज्याच्या आणि देशाच्या प्रश्नांमध्ये अधिकाधीक लक्ष घालण्यावर माझा भर असेल, याशिवाय मी कोणतीही अन्य जबाबदारी घेणार नाही. सार्वजनिक जीवनातील 1 मे, 1960 ते 1 मे, 2023 इतक्या प्रदीर्घ कालावधीनंतर आता कोठेतरी थांबण्याचा विचार करणे आवश्यक आहे. त्यामुळे मी राष्ट्रवादी काँग्रेस पक्षाच्या अध्यक्षपदावरून निवृत्त होण्याचा निर्णय घेतला आहे. तथापि शिक्षण, शेती, सहकार, क्रीडा, सांस्कृतिक क्षेत्रात अधिक काम करण्याचा माझा मानस आहे. तसेच युवक, युवती व विद्यार्थी यांच्या संघटनांकडे आणि कामगार, दलित, आदिवासी व समाजातील इतर कमकूवत घटकांच्या प्रश्नांकडे माझे लक्ष राहिल.

आम्ही कुणाकडे जायचे : जितेंद्र आव्हाड
यावेळी आपल्या भावना व्यक्त करताना राष्ट्रवादीचे नेते जितेंद्र आव्हाड म्हणाले की, साहेब आपण सर्वांचे अश्रू बघताय, भावनाही बघताय…आपण कार्यकर्त्याचा चेहरा पाहून त्याच्या मनात काय आहे, हे ओळखणारे जादूगार आहात. वय तुमच्यासाठी काही प्रश्न नाही. मी 2004 साली नागपूरमध्ये तुमच्या अंगातून रक्त वाहत असताना प्रचार करताना पाहिलं आहे. त्यापेक्षा आताची तुमची तब्येत खूप चांगली आहे. अशा अवस्थेत तुम्ही पक्ष सावरला आणि पक्षाला सत्तेत ठेवत आलात. सत्ता ही महत्वाची नाही, पण तुमच्यासारखा पुरोगामी माणूस महाराष्ट्रात पुन्हा होणे नाही. मी नेहमी तुमचे दर्शन घेतो, पुढचे दहा दिवस आरामात जातात. तुम्ही नसाल तर आमचं जीवनंच व्यर्थ आहे. आता येवढ्या अडचणी समोर असताना आम्ही कोणाकडे जायचं…अशा भावना जितेंद्र आव्हाड यांनी यावेळी व्यक्त केली.