यावल पालिकेच्या सभेत विविध विषयांना सभागृहाची मंजुरी

यावल : नगरपालिकेची सर्वसाधारण सभा माजी नगराध्यक्ष व विद्यमान नगरसेवक अतुल पाटील यांच्या अध्यक्षतेखाली मंगळवारी झाली. त्यात शहर विकासाच्या 32 विषयांना मंजुरी देण्यात आली. मुख्याधिकारी यांच्यासह प्रत्येक विभागाचे प्रमुख उपस्थित होते.

या विषयांना सभागृहाने दिली मान्यता
सभेत यावल नगरपालिकेच्या विस्तारीत भागातील नवीन पिण्याच्या टाकीवरून पाईप लाईन टाकण्याबाबत 14 व्या वित्त आयोगाच्या निधीतून तीन कोटी 65 लक्ष रुपये खर्च करण्यास सभेने मान्यता दिली, सानेगुरुजी विद्यालयातील विद्यार्थ्यांसाठी नवीन बेंचेस खरेदीकामी आलेल्या निविदेला मंजुरी देण्यात आली, विद्यालयात नवीन इमारत बांधकाम करण्यासाठी देखील वैशिष्ट्यपूर्ण योजनेतून निधी देण्याबाबत ठराव मंजूर करण्यात आला त्याचप्रमाणे शहरातील प्रभाग क्रमांक आठ, महाजन गल्लीमधील विविध रस्त्यांच्या काँक्रीट कामांना मंजुरी देण्यात आली, काजीपुरा भागात मुस्लिम बांधवांसाठी समाज मंदिराच्या दुसरा मजला बांधण्याबाबतच्या कामासदेखील मंजुरी देण्यात आली. सभेत नगरसेवक शेख असलम, नगरसेविका रेखा चौधरी, नगरसेवक सय्यद युनूस यांनी स्वच्छतेबाबत प्रश्न उपस्थित करून शहरात नियमित स्वच्छता होत नसल्याचे निदर्शनास आणून दिले. सभेसाठी मुख्याधिकारी बबन तडवी, कनिष्ठ अभियंता सईद शेख, योगेश मदने, रमाकांत मोरे, पंडित सावकारे, शिवानंद कानडे यांच्यासह कर्मचारी उपस्थित होते.