गुजरातमेड बनावट खव्याची भुसावळात विक्री : त्रिकूटाविरोधात गुन्हा

Sale of fake Gujaratmade Khawa in Bhusawal : Crime against the trio भुसावळ : गुजरातमध्ये मेड साडेपाच टन वजनाचा व तब्बल 12 लाख रुपये किंमतीच्या बनावट खवा शुक्रवारी दुपारी भुसावळात जप्त करण्यात आल्यानंतर अन्न व औषध प्रशासनाने ठोस भूमिका न घेतल्याने पोलिसच याप्रकरणात स्वतः फिर्यादी झाले आहेत. याप्रकरणी जप्त करण्यात आलेल्या आयशर लक्झरी चालकासह क्लिनरविरोधात भुसावळ बाजारपेठ पोलिसात शनिवारी गुन्हा दाखल करण्यात आला आहे. दरम्यान, पोलिसांनी दोन्ही वाहने जप्त केली असून अन्न औषध प्रशासनाच्या ताब्यात दिलेला बनावट खवा जळगावातील कोल्ड स्टोरेजमध्ये ठेवण्यात आला आहे. बनावट खव्याची राज्यात विक्री करण्यासाठी मोठी टोळी कार्यरत असल्याने लवकरच साखळीतील म्होरक्यांवर कारवाईची दाट शक्यता खास सूत्रांनी वर्तवली.

असे आहे बनावट खवा प्रकरण
भुसावळ शहरातील बेकरी, स्वीटमार्ट तसेच हॉटेल्समध्ये विकल्या जाणार्‍या मिठाईसह माव्याच्या मोदकांमध्ये भेसळयुक्त खव्याचा वापर केला जात असल्याची माहिती भुसावळ पोलीस उपअधीक्षक कृष्णात पिंगळे यांना मिळाली होती शिवाय हा खवा गुजरातमधून शहरात दाखल होत असल्याची टीप मिळाल्यानंतर त्यांनी पथकाला कारवाईचे निर्देश दिले होते. त्यानुसार पथकाने शुक्रवारी दुपारी 12 वाजता नाहाटा चौफुलीवर गुजरातमधून आलेल्या एम.के.ट्रॅव्हल्स (जी.जे.01 ए.टी.1210) मधून खवा उतरवून तो आयशर (जी.जे.38 टी.ए.1800) मध्ये टाकला जात असताना छापेमारी करण्यात आली. पथकाने दोन्ही वाहने जप्त करीत उपअधीक्षक कार्यालयात आणल्यानंतर मोजणीत तब्बल 176 बॅगमध्ये पाच हजार 340 किलो वजनाचा व 11 लाख 74 हजार 800 रुपये किंमतीचा बनावट खवा आढळल्याने तो जप्त करण्यात आला होता.