जागेसाठी रेल्वेतून झुला फेकला, युपीचा प्रवासी भुसावळातील यंत्रणेच्या जाळ्यात अडकला

Swinging from the train for space, the UP passenger got caught in the system’s net in Bhusawal भुसावळ : डाऊन कर्नाटक एक्स्प्रेसच्या विकलांग डब्यातील प्रवाशाने जागेसाठी चक्क लहान मुलांचा झुला (पाळणा) धावत्या एक्स्प्रेसमधून बाहेर फेकला मात्र हा झुला त्याचवेळी जाणार्‍या अप पुष्पक एक्स्प्रेसच्या इंजिनाला धडकला. इंजिनावर काहीतरी टणक वस्तू आदळल्याची बाब लोकोपायलटने ही नियंत्रण कक्षाला कळवताच यंत्रणा अलर्ट झाली. भुसावळात रेल्वे सुरक्षा बलाच्या पाच पथकांनी कर्नाटक एक्स्प्रेस येताच संबंधित प्रवाशाचा शोध धेवून त्याला बेड्या ठोकल्या. संशयित प्रवाशाला चाळीसगाव रेल्वे सुरक्षा बलाच्या ताब्यात देण्यात आले असून त्याच्याविरोधात गुन्हा दाखल करण्यात आला. पवन कुमार मुन्ना कुमार (26, सूबेदारपूर, टिकर, तहसील हस्वा, जि.फतेहपूर, उत्तर प्रदेश) असे अटकेतील प्रवाशाचे नाव आहे. दरम्यान, सुदैवाने फेकलेला झुला एखाद्या प्रवाशाला लागला नाही अन्यथा प्राणहानी होण्याचीदेखील भीती होती.

असे आहे नेमके प्रकरण
संशयित प्रवासी पवन कुमार मुन्ना कुमार हा सोमवारी अहमदनगरहून कानपूर जाण्यासाठी डाऊन 12627 कर्नाटक एक्सप्रेसच्या विकलांग डब्यातून प्रवास करीत होता. या डब्यात अज्ञात प्रवाशाचा झुला (पाळणा) राहून गेल्याने पवनकुमार याने चाळीसगावजवळील किलोमीटर क्रमांक 308 जवळ हा झुला फेकून दिला व त्याचवेळी अप पुष्पक मुंबईच्या दिशेने जात असताना झुल्याचा फटका रेल्वेच्या इंजिनाला बसला. टणक वस्तू आपटल्याचा आवाज झाल्यानंतर लोको पायलटने ही बाब नियंत्रण कक्षाला कळवली. अप्रिय घटना टाळण्याच्या हेतूने भुसावळ रेल्वे सुरक्षा बलाने डाऊन कर्नाटकच्या लोकोपायलटशी संपर्क साधून नेमका प्रकार जाणून घेतला.