रेल्वे प्रवाशांना काठीचा फटका मारून मोबाईलची लूट : टोळीतील म्होरक्या भुसावळ लोहमार्ग पोलिसांच्या जाळ्यात

Robbery of mobile phones by hitting railway passengers with sticks: Gang leader Bhusawal in Lohmarg police’s net भुसावळ : डाऊन काशी एक्स्प्रेसच्या सर्वसाधारण डब्यातून प्रवास करणार्‍या मनमाडच्या एका प्रवाशाकडील 56 हजारांचे दोन मोबाईल काठीचा फटका मारून टोळीने लुटले होते. या घटनेत काठीचा जबर फटका बसल्याने प्रवासी जखमीदेखील झाला होता. या घटनेप्रकरणी लोहमार्ग पोलिसांनी टोळीप्रमुखाला अटक केली आहे. रोहित उर्फ गिरीष उर्फ कचोरी दत्ता चौगुले (21, पाण्याच्या टाकीजवळ, हनुमान मंदिराजवळ, कुसूंबा, जि.जळगाव) असे अटकेतील आरोपीचे नाव असून त्याच्याकडून 56 हजार रुपये किंमतीचे दोन मोबाईल जप्त करण्यात आले आहेत. टोळीतील दोघे सदस्य अद्याप पसार असून त्यांचा शोध सुरू करण्यात आला आहे.

प्रवाशांकडील मोबाईल लुटीचा नवा फंडा
मनमाड येथील प्रवासी तथा लॅब टेक्नीशीयन सीमॉन व्हीक्टीर स्वामी (20, संत बार्नबा वसाहत, मनमाड) हे डाऊन काशी 215017 एक्स्प्रेसच्या इंजिनापासूनच्या तिसर्‍या सर्वसाधारण डब्यातून मनमाड ते भुसावळ असा प्रवास 27 ऑगस्ट 2023 रोजी दरवाज्याजवळ उभे राहून करीत असताना जळगाव ते रेल्वे गेट असोदादरम्यान अज्ञातांनी त्यांना काठीचा फटका मारल्याने ते रेल्वे रूळावर पडून जखमी कपाळाला व डोक्याला मार लागल्याने जमखी झाले. यावेळी तिघा अनोळखींनी पुन्हा त्यांच्या पायावर काठीने मारहाण करीत त्यांच्याकडील 56 हजार रुपये किंमतीचे दोन महागडे मोबाईल लांबवले होते. याप्रकरणी भुसावळ लोहमार्ग पोलिसात गुन्हा दाखल करण्यात आला होता. लोहमार्ग पोलिसांनी गोपनीय माहितीच्या आधारे आरोपी रोहित उर्फ गिरीष उर्फ कचोरी दत्ता चौगुले (21, पाण्याच्या टाकीजवळ, हनुमान मंदिराजवळ, कुसूंबा, जि.जळगाव) यास निष्पन्न करीत त्यास अटक केल्यानंतर त्याच्याकडून 35 व 21 हजार रुपये किंमतीचे मोबाईल जप्त केले तसेच गुन्ह्यात वापरलेली काठी जप्त केली. या गुन्ह्यातील दोन संशयित अद्याप पसार असून त्यांचा कसून शोध सुरू असल्याचे सूत्रांनी सांगितले.