यावल पोलिसांची मोठी कामगिरी : 37 दुचाकींची चोरी करणारी 16 जणांची टोळी ताब्यात

Big achievement of Yaval police : Gang of 16 who stole 37 bikes arrested यावल : यावल शहरातील कुंभार टेकडी वरून चोरीस गेलेल्या ट्रॅक्टरचा शोध घेतांना यावल पोलिसांना चोरट्यांची मोठी टोळीच हाती लागली आहे. यात पोलिसांनी तब्बल 14 संशयितांना ताब्यात घेतले असून त्यांनी 37 दुचाकी व एक ट्रॅक्टर चोरी केल्याची कबुली पोलिसांकडे दिली आहे. चोरीच्या 13 दुचाकी पोलिसांनी जप्त केल्या असून संशयितांची कसून चौकशी सुरू केली आहे. दुचाकींची चोरी केल्यानंतर ती एजंटच्यामार्फत विक्री करायचा उद्योग शहरातील तरुण करीत होते व या तरुणांकडून अजून मोठ्या प्रमाणावर चोर्‍यांचा उलगडा होण्याची दाट शक्यता आहे.

ट्रॅक्टर चोरीच्या तपासात टोळी अडकडली जाळ्यात
यावल शहरातील कुंभार टेकडी भागातून 14 सप्टेंबर रोजी मध्यरात्रीनंतर अजय मूलचंद पंडित यांचे ट्रॅक्टर चोरीला गेले. याप्रकरणी 18 सप्टेंबर रोजी यावल पोलिसात गुन्हा दाखल करण्यात आला. या गुन्ह्याचा तपास पोलिस निरीक्षक राकेश मानगावकर यांच्या मार्गदर्शनाखाली सहायक फौजदार विजय पाचपोळे व राजेंद्र पवार करीत असताना त्यांनी अर्जुन सुभाष कुंभार (19, रा.कुंभारवाडा यावल) यास ताब्यात घेतले. त्याने ट्रॅक्टर चोरीत शहरातील चौघे सोबत असल्याचे सांगीतले. चौघांना पोलिसांनी ताब्यात घेतल्यानंतर त्यांनी ट्रॅक्टरसह दुचाकीदेखील चोरी केल्याची कबुली दिली. यात काहींचा सहभाग असल्याची कबुली दिल्यानंतर तब्बल 16 संशयितांचा टोळी समोर आली.