शिवरायांचे विचार घेवून शहरात चांगले वक्ते घडतील

अंतर्नाद प्रतिष्ठान आणि शिक्षण विभाग आयोजित महावकृत्व स्पर्धेच्या बक्षीस वितरण सोहळ्यात मान्यवरांचा सूर

भुसावळ : अंतर्नाद प्रतिष्ठान व शिक्षण विभाग पंचायत समिती भुसावळ यांच्या संयुक्त विद्यमाने शिवजयंतीच्या निमित्ताने 10 फेब्रुवारी रोजी महावक्तृत्व स्पर्धा घेण्यात आली होती. चार गटातील 12 विजेत्यांसह 258 सहभागी विद्यार्थी आणि शिक्षक यांना रविवारी अंतर्नाद प्रतिष्ठानच्या वर्धापनदिनी गौरवण्यात आले. अध्यक्षस्थानी श्रीराम ड्रिपचे अध्यक्ष उद्योजक श्रीराम पाटील होते. प्रमुख पाहुणे म्हणून जळगाव जिल्हा परीषद अध्यक्ष रंजना पाटील, ताप्ती एज्युकेशन सोसायटी (नाहाटा कॉलेज) चे अध्यक्ष मोहन फालक, सिध्दवेद इन्फोटेकचे महेश फालक, गटशिक्षणाधिकारी तुषार प्रधान यांची उपस्थिती होती. शिवजयंतीच्या निमित्ताने आयोजित वक्तृत्व स्पर्धेतील प्रत्येक वर्गातील तीन विद्यार्थी यानुसार 30 विद्यार्थ्यांची अंतिम फेरी नाहाटा कॉलेज लायब्ररी हॉल येथे रविवारी पार पडली. परीक्षक म्हणून श्रीकांत जोशी, सतीश कुलकर्णी, दीपक पाटील, रीता शर्मा, दिनकर जावळे, अमितकुमार पाटील, निलेश नेहते, गणसिंग पाटील, अलका भटकर यांनी काम पाहिले.

40 परीक्षकांचा सन्मान
अंतिम फेरी झाल्यानंतर बक्षीस वितरण समारंभ पार पडला. प्रारंभी मान्यवरांच्या हस्ते छत्रपती शिवाजी महाराज यांच्या पुतळ्याला पुष्पहार अर्पण करण्यात आला. बक्षीस वितरण शुभारंभाप्रसंगी दादासाहेब दामू पांडू माध्यमिक विद्यालय सुनसगावच्या विद्यार्थिनी ममता शिरसाळे, खुशबू काटे, नेहा पाटील, कोमल शिरसाळे, रोशनी कोळी यांनी सुंदर असा पोवाडा म्हटला. त्यांना एच.डी.गाढे आणि सीताराम बिर्‍हाडे यांनी वाद्यावर साथ दिली. त्यानंतर वर्धापनदिनाच्या निमित्ताने विजय चौधरी यांनी अंतर्नाद प्रतिष्ठानवर स्वरचित एक गीत सादर केले. प्रास्ताविक प्रकल्प प्रमुख जिवन महाजन यांनी केले. योगेश इंगळे यांनी अंतर्नादच्या सात वर्षातील उपक्रमाचा आढावा सादर केला. नेव्हीचे कॅप्टन संदीप रायभोळे आणि सामाजीक क्षेत्रात विशेष योगदान दिल्याबद्दल अमित चौधरी यांचा अंतर्नादतर्फे सन्मानपत्र देउन गौरव करण्यात आला. समन्वयीका हेमांगिनी चौधरी यांनी सन्मानपत्राचे वाचन केले. स्पर्धकातर्फे पालवी चौधरी हिने नमुना वकृत्व सादर केले त्यानंतर स्पर्धेच्या 40 परीक्षकांना सन्मानित करण्यात आले.