Big operation of crime branch in Dhule : gold worth 85 lakhs seized धुळे (7 नोव्हेंबर 2024) : धुळे स्थानिक गुन्हे शाखेने चाळीसगाव रोड पोलीस ठाणे हद्दीत गोपनीय माहितीच्या आधारे एका व्यापार्याकडून सुमारे 85 लाख रुपये किंमतीचे सोने (गोल्ड बार) जप्त केल्याने शहरात खळबळ उडाली आहे. संबंधित व्यापार्याकडे सोने वाहतुकीच्या कुठल्याही पावती न आढळल्याने निवडणूक यंत्रणेला सूचित केल्यानंतर हे सोने ट्रेझरीत जमा करण्यात आल्याची माहिती सूत्रांनी दिली.
गोपनीय माहितीवरून कारवाई
धुळे पोलीस अधीक्षक श्रीकांत धीवरे, अपर पोलीस अधीक्षक किशोर काळे यांच्या मार्गदर्शनाखाली यंत्रणेने शहरात मोठ्या प्रमाणावर गस्त वाढवली असून सातत्याने नाकाबंदीही सुरू आहे. त्यातच धुळे गुन्हे शाखेचे वरिष्ठ पोलीस निरीक्षक श्रीराम पवार यांना एका इनोव्हा वाहनातून शहरात सोने येत असल्याची माहिती मिळाल्यानंतर त्यांनी पथकाला निर्देश दिले.
चाळीसगाव रोड पोलीस ठाणे हद्दीत इनोव्हा वाहन आल्यानंतर संबंधिताकडे एक किलो 85 ग्रॅम वजनाचे सोन्याचे बिस्कीट आढळले मात्र व्यापार्याकडे या संदर्भातील कुठल्याही पावत्या नसल्याने निवडणूक यंत्रणेला याबाबतची माहिती कळवण्यात आल्यानंतर यंत्रणेने पंचनामा करीत सोने ट्रेझरीत जमा केले. वाहन ताब्यात घेण्यात आले असून व्यापार्याला यंत्रणेने नोटीस बजावल्याचे सूत्रांनी सांगितले. या कारवाईला गुन्हे शाखेचे वरिष्ठ निरीक्षक श्रीराम पवार यांनी दुजोरा दिला.
