धुळे तालुका पोलिसांची मोठी कामगिरी : जबरी लुटीतील कुख्यात आरोपीसह दोघे जाळ्यात

Major Breakthrough for Dhule Taluka Police: Two Arrested, Including Notorious Robbery Suspect धुळे (12 मे 2026) : धुळ्याजवळील फागणेजवळ शतपावली करताना अनोळखी तिघांनी एकाचे अपहरण करीत त्यांच्याकडील मोबाईलसह खात्यातून एक लाख परस्पर वर्ग केले होते. जबरी लुट प्रकरणी धुळे तालुका पोलिसात गुन्हा दाखल होताच यंत्रणेने चक्रे फिरवत धुळ्यातील दोघा आरोपींना बेड्या ठोकल्या तर तिसर्‍या साथीदाराचा शोध सुरू केला आहे. एक आरोपी अट्टल असून त्याच्याविरोधात तब्बल 10 गुन्हे दाखल असल्याची माहिती सूत्रांनी दिली. आरोपींकडून गुन्ह्यात लुटलेल्या एक लाखांपैकी 75 हजारांची रोकड व अन्य दोन वाहने मिळून एक लाख 30 हजारांचा मुद्देमाल हस्तगत करण्यात आला.

असे आहे लूट प्रकरण
4 मे 2026 रोजी रात्री 10 वाजेच्या सुमारास अतुल दगडू पाटील हे फागणे गावातील शनि मंदिराजवळ शतपावली करत असताना दोन दुचाकींवर आलेल्या अनोळखी इसमांनी त्यांना गाठले. चहाची टपरी कुठे आहे, असे विचारण्याचा बहाणा करीत पाटील यांना जबरदस्तीने दुचाकीवर बसवून वरखेडी फाटा येथे नेले. तिथे त्यांना शिविगाळ व दमदाटी करत त्यांचा मोबाईल हिसकावून घेतला आणि ‘फोन पे’ द्वारे बँक खात्यातून एक लाख रुपये वर्ग करीत चोरटे पसार झाले होते.