जळगावात एसीबीची मोठी कारवाई : सहकारी उपनिबंधकासह मानद कार्यकारी अधिकारी एसीबीच्या जाळ्यात

Major ACB Operation in Jalgaon : Honorary Executive Officer, Along with Deputy Registrar of Cooperatives, Caught in ACB Net जळगाव (20 मे 2026) : अवैध सावकारी प्रकरणातील चौकशी अहवाल अनुकूल पाठवण्यासाठी पाच लाख रुपयांची लाच मागून अखेर तीन लाख रुपयांत तडजोड करीत लाचेचा पहिला हप्ता दिड लाख रुपये स्वीकारताना जळगाव उपनिबंधक सहकारी संस्था कार्यालयातील उपनिबंधक जगदीश बाबुराव बारी (वर्ग-1) (शांती नगर, यावल रोड, भॐसावळ) आणि त्यांचा खासगी साथीदार व जिल्हा बँकेचा मानद कार्यकारी अधिकारी देविदास धनसिंग पाटील (भुरे मामलदार प्लॉट, शिवाजीनगर, जळगाव) यांना जळगाव एसीबीने सापळा रचून अटक केली आहे. या कारवाईमुळे सहकार विभागात मोठी खळबळ उडाली आहे.

असे आहे लाच प्रकरण
एसीबीनुसार, तक्रारदाराविरुद्ध अवैध सावकारी संदर्भात कारवाई सुरू होती. या प्रकरणाची सुनावणी उपनिबंधक सहकारी संस्था, जळगाव कार्यालयात सुरू होती. तक्रारदार आणि त्यांच्या पत्नीविरुद्ध गुन्हा दाखल होऊ नये तसेच अवैध सावकारी चौकशी अहवाल अनुकूल पाठवण्यासाठी जळगाव उपनिबंधक जगदीश बारी यांनी सुरुवातीला पाच लाख रुपयांची मागणी केल्याचे निष्पन्न झाले. नंतर ही रक्कम तीन लाख रुपयांवर ठरवण्यात आली.