एकतर्फी प्रेमाचा संताप ; दामिनीवर 17 ते 18 वार करून हत्या !

घरी जाताना अडवून केला हल्ला
दामिनी महाविद्यालयातून एसटीने प्रवास करून गावात उतरली आणि घरी जात असताना आरोपी तिची वाट पाहत असल्याचा पोलिसांचा प्राथमिक अंदाज आहे. त्याने दामिनीला प्रेम स्वीकारण्याचा आग्रह धरला. तिने नकार दिल्यानंतर तिच्यावर धारदार शस्त्राने वार करण्यात आल्याचे तपासात समोर आले आहे. दामिनीवर 17 ते 18 वार करण्यात आल्याची माहितीही समोर आली आहे.

आरोपीच्या घरातून अटक; महत्त्वाचे पुरावे जप्त
घटनेनंतर फरार झालेल्या साहिल धुरी याला सिंधुदुर्ग पोलिसांच्या स्थानिक गुन्हे अन्वेषण विभागाने त्याच्या राहत्या घरातून ताब्यात घेतले. त्यावेळी रक्ताने माखलेले कपडे पोलिसांनी जप्त केले. पुढील तपासात हत्येसाठी वापरलेला चाकू, गुन्ह्यात वापरलेली दुचाकी तसेच दामिनी आणि साहिल यांचे मोबाईल फोन हस्तगत करण्यात आले. तपासाच्या अनुषंगाने पोलिसांनी आरोपीला घटनास्थळी नेऊन चौकशी केली. न्यायालयाने त्याला 24 ऑक्टोबरपर्यंत सात दिवसांची पोलीस कोठडी सुनावली आहे.

महिला सुरक्षेचा प्रश्न पुन्हा ऐरणीवर
महाविद्यालयीन तरुणीची एकतर्फी प्रेमातून हत्या झाल्याच्या या घटनेमुळे महिला सुरक्षेचा प्रश्न पुन्हा चर्चेत आला आहे. या प्रकरणातील नेमकी कारणे, घटनाक्रम आणि इतर पुराव्यांचा तपास पोलीस करीत आहेत. आरोपीविरुद्ध खुनाचा गुन्हा दाखल करण्यात आला असून, पुढील तपासातून अधिक माहिती समोर येण्याची शक्यता आहे.