सातार्‍यानजीक ट्रॅव्हल्स ट्रकच्या धडकेत सहा जण ठार
20 प्रवासी जखमी : खंडेवाडीनजीक दुर्घटना : मयत, जखमी कनार्टकातील रहिवासी
सातारा- पुणे-बंगळुरू महामार्गावर ट्रॅव्हल बस आणि ट्रकच्या भीषण अपघातात सहा प्रवासी ठार झाल्याची तर 20 प्रवासी जखमी झाल्याची घटना सातारा शहरानजीक असलेल्या खंडेवाडीजवळ गुरुवारी सकाळी हा अपघात झाला. अपघातातील मयत आणि जखमी प्रवाशी कर्नाटकातील असल्याचे समजते. पुणे-बंगळुरू महामार्गावरून कोल्हापूरकडे मालवाहतूक करणारा ट्रक जात असताना ट्रकमागेच प्रवाशी वाहतूक करणारी ट्रॅव्हल बसही जात होती. सातारा शहरानजीक असलेल्या खंडेवाडीजवळील उतारावर अचानक ट्रकचे टायर फुटले. टायर फुटल्यामुळे चालकाने ट्रक जागीच थांबवला तर भरधाव ट्रॅव्हल्स बस पाठीमागून ट्रकवर जोरात आदळली. या भीषण अपघातात सहा प्रवासी जागीच ठार तर 20 प्रवासी जखमी झाले.
मयत व जखमी कर्नाटकातील
घटनेची माहिती मिळताच पोलिसांनी घटनास्थळी धाव घेतली. बसमध्ये अडकलेल्या प्रवाशांना बाहेर काढल्यानंतर जखमींना जवळच्या शासकीय रूग्णालयात हलवण्यात आले. घटनेतील मृत आणि जखमी प्रवाशी कर्नाटकातील असल्याचे वृत्त आहे.
