एटीएम मशीनमधून मिळणार आता सोन्याचे नाणे : देशात प्रथमच प्रयोग

Gold coins will now be available from ATM machines: first experiment in the country नवी दिल्ली : देशात प्रथमच आता सोनेदेखील एटीएम मशीनमधून प्राप्त होणार आहे. लोक डेबिट आणि क्रेडिट कार्ड वापरून सोने खरेदी करू शकतात. या एटीएममधून 0.5 ग्रॅम ते 100 ग्रॅमपर्यंतची सोन्याची नाणी मिळणार आहेत. तेलंगणाची राजधानी हैदराबादमध्ये देशातील पहिले रिअल टाइम सोन्याचे एटीएम बसवण्यात आले आहे.

शंभर ग्रॅम पर्यंतची नाणी मिळणार
ओपनक्यूब टेक्नॉलॉजीजच्या मदतीने हैदराबादस्थित कंपनी गोल्डसिक्का प्रायव्हेट लिमिटेडने देशातील पहिले सोन्याचे एटीएम स्थापित केले आहे. या एटीएमद्वारे ग्राहक सोन्याची नाणी खरेदी करण्यासाठी डेबिट किंवा क्रेडिट कार्ड वापरू शकतात. हे एटीएम सामान्य एटीएम (पैसे असलेले एटीएम) प्रमाणेच काम करते. विशेष म्हणजे गोल्डसिक्का हे सोने खरेदी-विक्रीचा व्यवसाय करतात. कंपनीचे सीईओ सी. तरुज यांनी दिलेल्या माहितीनुसार, या एटीएममधून लोक 0.5 ग्रॅम ते 100 ग्रॅमपर्यंतची सोन्याची नाणी काढू किंवा खरेदी करू शकतात. एवढेच नाही तर या एटीएमवरील सोन्याची किंमत थेट अपडेट केली जाईल, जेणेकरून फसवणूक होऊ नये. या गोल्ड एटीएमची सेवा 24 तास उपलब्ध असेल.

देशभरात सुरू होणार एटीएम
कंपनीचे सीईओ सी. तरुज यांनी दिलेल्या माहितीनुसार, कंपनी देशभरात आणखी एटीएम उघडणार आहे. कंपनी पेड्डापल्ली, वारंगल आणि करीमनगर येथेही गोल्ड एटीएम उघडण्याचा विचार करत आहे. याशिवाय, पुढील 2 वर्षांत भारतभर सुमारे 3,000 गोल्ड एटीएम उघडण्याची कंपनीची योजना आहे. यापूर्वी, गेल्या वर्षी हरियाणातील गुरुग्राममध्ये देशातील पहिले ग्रीन एटीएम बसवण्यात आले होते. त्यावेळी अन्न आणि पुरवठा विभागाचे प्रभारी आणि हरियाणाचे उपमुख्यमंत्री दुष्यंत चौटाला म्हणाले होते की, धान्याचे एटीएम बसवल्यानंतर सरकारी दुकानातून रेशन घेणार्‍यांच्या सर्व तक्रारी दूर केल्या जातील. अशाप्रकारे आता देशात विविध प्रकारचे एटीएम बसवले जात आहेत.