भुसावळात रंगला मंगळागौरीचा खेळ

स्वयंसिध्दा सखी मंडळाने सादर केले प्रात्यक्षिक

भुसावळ : ‘चला ग मंगळा गौरीचा, करुया जागर’, ‘किस बाई किस दोडका किस’, ‘घागर घूमु दे’, ‘नाच ग घुमा’ अशा गाण्यांवर मंगळागौरीचा पारंपरीक खेळ शहरातील प्राची अपार्टमेंटमधील सुषमा कुळकर्णी यांच्या घरी रंगला. भुसावळच्या स्वयंसिद्धा सखी मंडळातर्फे यानिमित्ताने गाणी, उखाणे व विविध प्रात्यक्षिके सादर करण्यात आली.
श्रावण महिन्यात नव-वधूचा येणारा पहिलाच सण म्हणजे मंगळागौर होय. या दिवशी नवदाम्पत्य महादेवाची पूजा करतात त्यानंतर रात्री नववधूच्या मैत्रिणी गाणे म्हणत खेळतात मात्र परंपरा लोप पावत चालल्याने खेळाची परंपरा टिकवण्यासाठी काही महिला झटत आहेत.

नव-वधूने सहभागी होत वाढवला उत्साह
मंगळागौर सणा निमित्ताने स्वयंसिध्दा सखी मंडळातर्फे पारंपरीक वेषभूषेत खेळ सादर करण्यात आले. यात झिम्मा, फुगडी, पिंगा, गाठोड, गोफ, आगोटा पागोटा, लाट्याबाई लाट्या, ताक घुसळणे आदी विविध प्रात्यक्षिके सादर करण्यात आली. ‘चला ग मंगळागौरीचा करुया जागर’, ‘रुणुझूणूच्या पाखरा’, ‘किकीच पान बाई किकीच’, ‘नाच ग घुमा’, ‘अग अग सुनबाई’ आदी पारंपरीक गाणी सादर करतांना बहिणाबाईंची ‘अरे संसार संसार’ या कवितेवर आधारीत नाटिका सादर करण्यात आली. विविध उखाणे घेत या खेळात नववधूलाही सहभागी करून घेण्यात आले. शोभा इंगळे, सुरेखा मोरे, सरीता चौक यांनी गाणी म्हटली. त्यांना यश कुलकर्णी याने तबल्यावर साथ दिली. सीमा डोलारे यांनी विविध प्रसंगांची पार्श्वभूमी सांगणारे निवेदन ओघवत्या शैलीत सादर केले. सुनीता कुलकर्णी, सरोज कवीश्वर, धनश्री जोशी, मनीषा इखे, साधना तारांबळे, प्रगती कुलकर्णी, रूपाली महाजन, ज्योती कुलकर्णी, मंगला कुलकर्णी यांनी खेळाच्या माध्यमातून विविध प्रात्यक्षिके सादर केली.

पारंपरीक सांस्कृतिक ठेव्याचे व्हावे जतन
मंगळागौरीच्या खेळामुळे महिलांच्या संपूर्ण शरीराचा व्यायाम होत असल्याने वेगळी योगासने करण्याची गरज पडत नाही. या खेळामुळे आमच्या मनाला आनंद तर मिळतोच शिवाय समाधानही वाटते तसेच प्रेक्षकांचे यानिमित्ताने सात्विक मनोरंजनही होते. नव्या पिढीला हा पारंपरीक सांस्कृतिक ठेवा माहीत असणे आवश्यक असल्याचे असे मत स्वयंसिध्दा सखी मंडळाच्या ग्रुप प्रमुख सुनीता कुलकर्णी यांनी व्यक्त केले.