भाऊ म्हणून पंकजा मुंडेंच्या पाठिशी राहणार : धनंजय मुंडे

Will stand by Pankaja Munde as a brother : Dhananjay Munde बीड : माझ्या बहिणीला उमेदवारी मिळाल्याचा आनंद आहे. तिचं स्वागत करायला मी इथे असणे हे माझे काम आहे, असे धनंजय मुंडे यांनी सांगत भाऊ म्हणून पंकजाच्या पाठिशी असणार असल्याचे ते म्हणाले. पंकजा यांची उमेदवारी जाहीर झाल्यानंतर पहिल्यांदाच तिघेही गोपीनाथ गडावर आले. यामुळे बीडच्या राजकारणात नवे समीकरण पाहायला मिळाले.

हा तर भावनिक क्षण
भाजपच्या नेत्या, बीड लोकसभेच्या उमेदवार पंकजा मुंडे, भाजप नेत्या प्रीतम मुंडे आणि राज्याचे कृषीमंत्री धनंजय मुंडे हे तिन्ही मुंडे बंधू भगिनी गोपीनाथ गडावर आले असता धनंजय मुंडे म्हणाले की, आम्ही तिघे गोपीनाथ गडावर आलो आहोत, हा माझ्यासाठी भावनिक क्षण आहे. ताईला उमेदवारी मिळाल्यानंतर जिल्ह्याच्या वेशीवरच त्यांचे स्वागत करणार होतो. पण त्या म्हणाल्या की, तू पालकमंत्री आहेस, तर तू घरी थांब मी भेटायला येते. माझ्या बहिणीला उमेदवारी मिळाली आहे.

गोपीनाथ मुंडेंच्या स्मृतींना पुष्पहार अर्पण
प्रीतम, पंकजा आणि धनंजय मुंडे यांनी भाजपचे दिवंगत नेते गोपीनाथ मुंडे यांना अभिवादन केले. या तिघांनीही गोपीनाथ मुंडे यांच्या स्मृतींना पुष्पहार अर्पण केला. यावेळी त्यांनी माध्यमांशी संवाद साधला. लोकसभेची मी उमेदवार आहे. त्यामुळे मी आज गोपीनाथ गडावर आले आहे. मी ठरवले होते की, जिल्ह्याचे पालकमंत्री धनंजय मुंडे यांच्या घरी जावून त्यांच्याशी चर्चा करावी. आमच्या काकींचे आणि अण्णांचे आशिर्वाद घ्यावेत. पण धनंजय यांनी सांगितले की तेच गोपीनाथ गडावर येत आहेत, असे पंकजा म्हणाल्या.