शिरपूर तालुक्यात 10 एकरावरील गांजा शेती नष्ट : केंद्रीय महसूल गुप्तचर यंत्रणेच्या कारवाईने खळबळ
शिरपूर (3 एप्रिल 2025) : शिरपूर तालुक्यातील आंबे-रोहिणी परिसरात बुधवारी केंद्रीय महसूल गुप्तचर यंत्रणेच्या मुंबईच्या पथकाने पुणे आणि नागपूर प्रादेशिक युनिट्सच्या सहकार्याने सांगवी पोलिस ठाणे हद्दीतील 9.49 एकरावरील बेकायदेशीर गांजाची शेती नष्ट केली.
गांजा शेती नष्ट
पथकाने बुधवारी सकाळी गांजाच्या शेतीवर मोठी कारवाई केली. सात ठिकाणी करण्यात येत असलेली शेती उद्ध्वस्त करण्यासाठी न्यायालयीन दंडाधिकार्यांच्या उपस्थितीत मोजमाप घेण्यात आले आणि भूअभिलेखांसह जिओ-टॅग केलेल्या छायाचित्रांची नोंद करण्यात आली. एनडीपीएस कायद्याच्या कलम 48 अंतर्गत संपूर्ण गांजाची शेती जप्त करून नष्ट करण्यात आली. या कारवाईत एकूण 96 हजार 49 गांजाची बेकायदेशीर झाडे नष्ट करण्यात आली, तसेच 420 किलो वाळवलेला गांजा, गोण्यांमध्ये भरलेला आढळला. तो जप्त करून नष्ट करण्यात आला.
