30 हजारांची लाच भोवली : धुळ्यातील खाजगी पंटर एसीबीच्या जाळ्यात
प्रांताधिकारी, नायब तहसीलदारांसह कर्मचार्‍यांच्या नावाने मागितली लाच
Bribe worth Rs 30,000 : Private punter from Dhule caught in ACB’s net धुळे (2 जून 2025) : भामटा राजपुत जातीचे प्रमाणपत्र मिळवून देण्यासाठी अधिकार्‍यांच्या नावाने 30 हजारांची लाच मागून ती स्वीकारताना धुळ्यात खाजगी पंटराला एसीबीने अटक केली. वाल्मिक प्रतापसिंग झाल्टे (राजपुत) असे अटकेतील संशयीताचे नाव आहे. सोमवारी सायंकाळी झालेल्या या कारवाईने लाचखोरांमध्ये खळबळ उडाली असून अनेकांची आता चौकशी होणार असल्याचे सूत्रांनी सांगितले.
असे आहे लाच प्रकरण
तक्रारदाराच्या नातु व नातीचे भामटा राजपुत या जातीचे जात प्रमाणपत्र मिळण्याकरीता 16 नोव्हेंबर 2024 रोजी आवश्यक त्या कागदपत्रासह ऑनलाईन अर्ज करण्यात आला व पोहोच पावतीही घेण्यात आली. या बाबीला सुमारे सहा महिन्याचा कालावधी होवून देखील तक्रारदाराला प्रमाणपत्र मिळाले नसल्याने त्यांनी 30 मे 2025 रोजी उपविभागीय अधिकारी यांची भेट घेण्याचा प्रयत्न केला असता त्यांची भेट झाली नाही मात्र कार्यालयात पंटर वाल्मिक झाल्टे हे भेटले. त्यांनी तक्रारदाराला उपविभागीय कार्यालयात त्यांचे सर्वांशी चांगले संबंध असल्याचे व त्यांच्या मार्फतच पैसे घेवून लोकांची कामे होत असल्याचे सांगितले. भामटा राजपूत जातीच्या प्रत्येक दाखल्याचे प्रत्येकी 15 हजार रुपयांप्रमाणे 30 हजार रुपये द्यावे लागतील, असे सांगून त्यांनी प्रांताधिकारी, नायब तहसीलदार संजय शिंदे व कार्यालयातील कर्मचारी हे माझ्याकडुन पैसे घेवून तुमचे काम करुन देतील, ते प्रत्यक्ष तुम्हाला भेटणार नाहीत, असे सांगितल्याची तक्रारदाराने तक्रार दिली होती. एसीबीने लाच पडताळणी केल्यानंतर सापळा रचण्यात आला.
रेल्वे स्टेशनजवळ स्वीकारली लाच
सोमवारी सायंकाळी उशिरा धुळे रेल्वे स्टेशनच्या प्रवेशव्दारासमोर पंचासमक्ष खाजगी पंटर वाल्मीक झाल्टे यास लाच घेताना धुळे एसीबीने पकडले. आरोपीविरोधात धुळे शहर पोलीस स्टेशनला गुन्हा दाखल करण्यात आला.
यांनी केला सापळा यशस्वी
हा सापळा धुळे एसीबीचे पोलीस उपअधीक्षक सचिन साळुंखे, पोलीस निरीक्षक रुपाली खांडवी, पोलीस निरीक्षक पंकज शिंदे, राजन कदम, मुकेश अहिरे, प्रवीण मोरे, संतोष पावरा, रामदास बारेला, प्रशांत बागुल, मकरंद पाटील, प्रवीण पाटील, सुधीर मोरे, जगदीश बडगुजर आदींच्या पथकाने यशस्वी केला.
