धुळे रेस्ट हाऊसमधील घबाड प्रकरण : नांदेडहून तिसरा संशयीत ताब्यात

या प्रकरणात विधिमंडळ अंदाज समितीचे अध्यक्ष आमदार अर्जुन खोतकर यांचे स्वीय सहाय्यक किशोर पाटील यांना चौकशीसाठी ताब्यात घेण्यात आले होते. पाटील यांचे निलंबनही करण्यात आले असून, या प्रकरणाचे राज्यभरात तीव्र पडसाद उमटले आहेत. मुख्यमंत्री देवेंद्र फडणवीस यांनी या प्रकरणाच्या एसआयटी (विशेष तपास पथक) चौकशीची घोषणा केली आहे.

सीसीटीव्हीद्वारे अधिक तपास
धुळे पोलिसांनी या प्रकरणाचा छडा लावण्यासाठी सीसीटीव्ही फुटेजचा कसून अभ्यास केला आहे. सीसीटीव्हीमध्ये दिसणार्‍या व्यक्ती नेमक्या कोण होत्या, दिसत गाड्या कोणाच्या होत्या आणि या व्यक्ती गुलमोहर शासकीय विश्रामगृहात का आल्या होत्या? याबाबत ताब्यात घेण्यात आलेल्या दोन्ही संशयितांना सीसीटीव्ही फुटेज दाखवून त्यांचे जबाब नोंदवण्याचे काम सुरू आहे. सीसीटीव्ही फुटेजमध्ये दिसणार्‍या इतर व्यक्तींनाही ओळखून त्यांना तपासामध्ये सहभागी करून घेण्यात येणार आहे. तसेच, आरोपींचे सीडीआर (कॉल डिटेल रेकॉर्ड) देखील पोलिसांना प्राप्त झाले असून त्यातून अधिक धागेदोरे मिळण्याची शक्यता आहे.