यावलमधील बालकाच्या हत्येचा हिंदू-मुस्लीम बांधवांकडून निषेध
यावल तहसीलसह पोलिस ठाण्यात निवेदन आरोपीला फाशीची शिक्षा देण्याची मागणी
Hindu-Muslim brothers condemn the murder of a child in Yaval यावल (9 सप्टेंबर 2025) : यावल शहरातील श्री जीवा महाले नाभिक बहुउद्देशीय संस्था तसेच शहरातील सलून व्यवसाय करणारे हिंदु- मुस्लिम खलिफा न्हावी यांच्या वतीने मंगळवारी तहसील कार्यालय व पोलीस ठाण्यात निवेदन देण्यात आले. शहरातील बाबूजीपुरा भागात सलून व्यवसाय करणार्या तरुणाने बालकाची केल्या निर्घृण हत्येचा त्यांनी तीव्र निषेध केला व सदर दोषी तरुणाला फाशीची शिक्षा देण्यात यावी, अशी मागणी निवेदनातून त्यांनी केली आहे.
पाच वर्षीय बालकाची निर्घृण हत्या
शहरातील बाबूजीपुरा भागात एका पाच वर्षीय बालकाची सलून व्यावसायीक असलेल्या शेख शाहिद शेख बिस्मिल्ला न्हावी (22) या तरुणाने निर्घृण हत्या केली होती. या घटनेच्या निषेधार्थ यावल शहरात मंगळवारी श्री जिवा महाले नाभिक बहुउद्देशीय संस्था, शहरातील हिंदू- मुस्लिम खलिफा न्हावी बांधवांनी एकत्र येत तसेच सलून व्यावसायीक संघटनांनी एकत्र येऊन यावल पोलिसात पोलिस निरीक्षक रंगनाथ धारबळे व तहसील कार्यालयात तहसीलदार मोहनमाला नाझीरकर यांच्याकडे निवेदन दिले.
आरोपीला व्हावी फाशीची शिक्षा
निवेदनाचा आशय असा की, बाबूजीपुरा भागात राहणार्या बालकाची हत्या करणार्या शेख शाहिदवर कठोर कारवाई करण्यात यावी, त्याचे कृत्ये हे अमानवीय कृत्य आहे. त्याचे कुणीही समर्थन करणार नाही. जलद न्यायालयात खटला चालवून त्याला कठारोत कठोर व फाशीची शिक्षा देण्याची मागणी करण्यात आली.
यांची होती उपस्थिती
निवेदन देते प्रसंगी अनिल चौधरी, सईद रऊफ न्हावी, सुपडू वारूळकर, समसोद्दीन मोईनोद्दीन, अमोल आमोदकर, शहाबुद्दीन मोईनोद्दीन, राजेंद्र चौधरी, शेख रऊफ न्हावी, ईश्वर सोनवणेसह मोठ्या संख्येत सलून व्यावसायीक व न्हावी समाज बांधव, मुस्लिम खलिफा न्हावी बांधव उपस्थित होते.
कुटुंबाचे केले सांत्वन
या घटनेनंतर शहरातील मुस्लिम खलिफा न्हावी बांधवांनी घटनेच्या निषेधार्थ आपला व्यवसाय हा बंद ठेवला. हिंदू-मुस्लिम न्हावी बांधव एकत्र आले व त्यांनी मयत बालकाच्या कुटुंबीयांची सांत्वनपर भेट घेतली त्यांना सहानभूती दिली.
