‘Honey trap’ on Kolhapur MLA ; Brother-sister arrested कोल्हापूर (14 ऑक्टोबर 2025) : चंदगड विधानसभा मतदारसंघाचे आमदार शिवाजी पाटील यांना ‘हनी ट्रॅप’मध्ये फसवून त्यांची बदनामी करण्याची आणि पैसे उकळण्याची धमकी देण्यात आल्याचा प्रकार समोर आल्याने खळबळ उडाली आहे. एका महिलेने अश्लील मेसेज, फोटो आणि व्हिडिओ पाठवून झालेल्या संभाषणाच्या आधारावर आमदारांकडे दहा लाख रुपयांची मागणी केली आहे.
काय आहे नेमके प्रकरण ?
चंदगडचे आमदार शिवाजी पाटील यांना वर्षभरापासून अश्लील मेसेज, फोटो आणि व्हिडिओ पाठवून त्रास दिला जात होता. या त्रासाला कंटाळून आमदार पाटील यांनी अखेर 8 ऑक्टोबर रोजी ठाण्यातील चितळसर पोलिस ठाण्यात तक्रार दाखल केली. यानंतर कोल्हापूर आणि ठाणे पोलिसांनी तात्काळ तपासाची चक्रे फिरवली आणि या प्रकरणात चंदगड तालुक्यातील मांडेदुर्ग गावातील बहीण-भावाला अटक केली आहे.
बहीण-भावाचा प्रताप, पोलिसांकडून अटक
अटक करण्यात आलेल्या आरोपींमध्ये मांडेदुर्ग येथील मोहन जोतिबा पवार आणि त्याची बहीण शामल पवार यांचा समावेश आहे. या दोघांनी मिळून वेगवेगळ्या मोबाईल क्रमांकावरून आमदार शिवाजी पाटील यांना अश्लील चॅट, फोटो आणि धमकीचे मेसेज पाठवले, असा आरोप तक्रारीत आहे.
मैत्रीच्या मागणीपासून सुरुवात
तक्रारीनुसार, बहीण-भावाने सुरुवातीला आमदारांसोबत मैत्री करण्याची इच्छा व्यक्त केली आणि चॅटिंग सुरू केले. यानंतर त्यांची राजकीय प्रतिमा मलीन करण्याची धमकी देत दोन-तीन वेळा मिळून एकूण 10 लाख रुपयांची मागणी करण्यात आली. आमदारांनी सुरुवातीला हे त्रासदायक मेसेज आणि नंबर ब्लॉक केले, तरीही आरोपींनी नवनवीन नंबर वापरून आपला त्रास देणे सुरूच ठेवले.
या प्रकारानंतर आमदार पाटील यांनी हा ’हनी ट्रॅप’ नसून, राजकीय दडपशाहीचा प्रयत्न असल्याचा दावा पत्रकारांशी बोलताना केला होता. दरम्यान, पोलिसांनी गुन्हा दाखल करून तातडीने तपास सुरू केल्याने या प्रकरणातील आरोपींना अटक करणे शक्य झाले.
