Chopra city police nabs persistent burglars in Dhadgaon taluka चोपडा (16 ऑक्टोबर 2025) : शहरातील घरफोडी प्रकरणात पोलिसांनी सराईत आरोपी प्रकाश विजय पावरा (28, रा.तोरणमाळ, ता.धडगाव, जि.नंदुरबार) यास शिरपूर येथून अटक केली. आरोपीच्या ताब्यातून एक लाख चार हजार 700 रुपयांचा मुद्देमाल जप्त करण्यात आला. संशयिताविरोधात शहादा आणि दोंडाईचा पोलीस ठाण्यात 10 ते 12 घरफोडीचे गुन्हे दाखल आहेत.
काय घडले चोपडा शहरात ?
विजय नारायण बाविस्कर (69, रा. देशमुख नगर, चोपडा) यांच्या घरात 29 सप्टेंबरच्या रात्री चोरी झाली होती. याप्रकरणी दाखल गुन्ह्याच्या तपासात पोलिसांनी तांत्रिक माहितीच्या आधारे 12 ऑक्टोबर रोजी या संशयित आरोपीला ताब्यात घेतले. त्याने गुन्ह्याची कबुली दिली. पोलिसांनी त्याच्याकडून सोन्याच्या दोन अंगठ्या व 3 सोन्याच्या बाळ्या, सोन्याची साखळी (सुमारे 20 हजार रुपये किंमत), टेक्नोस्पार्क कंपनीचा मोबाईल, चांदीची चैन व पैंजण, यामाहा दुचाकी (एम.एच.18 ए.एफ.9582) असा एकूण एक लाख चार 700 रुपयांचा मुद्देमाल जप्त केला आहे.
यातील काही दागिने हे जून महिन्यात झालेल्या दुसर्‍या घरफोडी प्रकरणातील असल्याचेही पोलिसांच्या तपासात निष्पन्न झाले आहे. आरोपीने चोरीचा माल वाघबडली (ता. शिरपूर) येथील शेतात मोटारसायकलमध्ये लपवून ठेवला होता.
यांनी आवळल्या मुसक्या
ही कारवाई पोलिस अधीक्षक महेश्वर रेड्डी, अपर पोलिस अधीक्षक कविता नेरकर, उपविभागीय पोलिस अधिकारी अण्णासाहेब घोलप यांच्या मार्गदर्शनाखाली पोलिस निरीक्षक मधुकर साळवे यांच्या नेतृत्वात एपीआय एकनाथ भिसे, फौजदार चेतन परदेशी,ज्ञानेश्वर जवागे, मदन पावरा, अजिंक्य माळी, योगेश पाटील, विलास पारधी आदींनी केली.
