आमदार बच्चू कडू यांचे वादग्रस्त विधान : आत्महत्या करण्याऐवजी आमदारांनाच कापून टाका !
MLA Bachchu Kadu’s controversial statement: Instead of committing suicide, cut off the MLAs! बुलढाणा (20 ऑक्टोबर 2025) : प्रहार जनशक्ती पक्षाचे प्रमुख आमदार बच्चू कडू यांनी धक्कादायक विधान करीत राज्यता खळबळ उडवून दिली आहे. शेतकरी आत्महत्येच्या विषयावर बोलताना त्यांनी शेतकर्‍यांनी आत्महत्या करण्याऐवजी थेट आमदारांना ‘कापून टाकण्याची’ भाषा केली आहे. बुलढाण्यातील शेतकरी हक्क परिषदेत ते बोलत होते.
बुलढाण्यात राज्यव्यापी परिषद
बुलढाणा जिल्ह्यातील पातुर्डा गावात नुकतीच राज्यव्यापी शेतकरी हक्क परिषद झाली. या परिषदेत राष्ट्रीय समाज पक्षाचे प्रमुख महादेव जानकर, बच्चू कडू आणि ऑल इंडिया पॅन्थर सेनेचे दीपक केदार यांच्या प्रमुख सहभागाने चर्चा झाली. दिवाळीच्या शुभ मुहूर्तावर आयोजित ही परिषद शेतकर्‍यांच्या दुःखाची आणि वेदनेची सभा ठरली. यावेळी बोलताना बच्चू कडू यांनी स्वत: आत्महत्या करण्यापेक्षा आमदारांना कापून टाका, असे खळबळजनक विधान केले.
काय म्हणाले बच्चू कडू?
ही वेदनाची परिषद, दुःखाची परिषद आहे. दिवाळीच्या दिवशी ही घ्यावी लागत आहे. तुम्ही विचाराची लढाई सोडली आणि जाती-पातीची लढाई सुरू केली, त्यामुळे शेतकरी मागे राहिला. शेतकर्‍यांना कमी भावात सोयाबीन विकावे लागत असेल तर शेतकर्‍यांनी बांगड्या भराव्यात. मोर्चे, मेळावे, प्रचाराला गर्दी असते मात्र शेतकरी परिषदेला गर्दी कमी असते, असे बच्चू कडू म्हणाले.
मला निवडणुकीत शेतकर्‍यांनीच पाडले
बाबासाहेबांनी तलवारीने सुरू झालेली लढाई लेखणीने संपविली. शरद जोशी अडीच लाख पगाराची नोकरी सोडून शेतकर्‍यांसाठी लढले. या सरकारने शेतकर्‍यांना भगवा हिरवा निळा रंगात वाटले आणि त्यामुळे शेतकरी वाटल्या गेला. शरद जोशींना, डॉ. बाबासाहेब आंबेडकरांना आणि मलाही शेतकर्‍यांनीच पडले. कारण मी जातीत बसलो नाही. तुम्ही असेच कराल तर तुमच्यासाठी कोणीही लढणार नाही. असही बच्चू कडू म्हणाले.
डुक्कर परवडले पण सरकार नाही
लोकसभेची निवडणूक असताना तुम्ही कापसाला, सोयाबीनला भाव मागितला का? तुम्ही जात पाहिली. पण सर्व जाती याच मातीमुळे जगतात हे विसरू नका. शेतकरी हे सगळ्या जातीत सापडतात. सर्वात जास्त मेहनत आमची आणि आपल्याला हे लुटतात. सरकार हे डुकरासारखे आहे, डुक्कर परवडले पण सरकार नाही. शहरातले आमदार परवडले, पण शेतकर्‍यांचा आमदार परवडत नाही. शहरातल्या आमदारांचे मस्त असते हप्ते वसूल केले की झाले, अशी टीका बच्चू कडू यांनी केली.
आत्महत्या करण्यापेक्षा आमदाराला कापा
तुमच्यापेक्षा तुमचा बैल बरा, त्याला लाथ तरी मारता येते. आपण जर शेतकर्‍याला विचारले तर तू काय करतो, तर त्याला काहीच येत नाही. अरे आत्महत्या करण्यापेक्षा एखाद्या आमदाराला कापून टाका. हा कार्यक्रम जर सुरू केला, तर सरकार गुडघ्यावर येईल. पण हा कार्यक्रम कोणाला द्यायचा. मारण्यापेक्षा लढणे सुरू करा. आमच्या मालाला भाव मिळाला तर आम्ही लोकांना नोकरीला ठेवू. आरक्षणामुळे एखादी परिवार किंवा समाज सुखी होऊ शकतो, मात्र मालाला भाव मिळाला तर अख्खा गाव सुखी होऊ शकेल, असेही बच्चू कडू म्हणाले.
या परिषदेत बच्चू कडू यांनी 28 ऑक्टोबरला नागपूर मोर्चाची घोषणा केली.
