पुण्यातील शनिवार वाड्यात सामूहिक नमाज पठण ; राज्यात सत्ताधारी-विरोधकांमध्ये जुंपली

मेधा कुलकर्णींचा वातावरण दूषित करण्याचा प्रयत्न
उपमुख्यमंत्री अजित पवार यांच्या नेतृत्वातील सत्ताधारी राष्ट्रवादी काँग्रेसच्या नेत्या रुपाली ठोंबरे यांनी या प्रकरणी खासदार मेधा कुलकर्णी यांच्या भूमिकेवर तीव्र संताप व्यक्त केला आहे. त्यांनी या प्रकरणी त्यांच्यावर सामाजिक तेढ निर्माण करण्याचा गुन्हा दाखल करण्याची मागणी केली आहे. भाजपने खासदार मेधा कुलकर्णी यांना आवरावे, शनिवारवाडा ही वास्तू कुणाच्याही बापाची नाही. शनिवारवाडा हा मराठा साम्राज्य व पेशव्यांचा आहे. पुणेकर सर्व जाती-धर्माचे आहेत त्यामुळे मेधा कुलकर्णी यांनी यांनी येथील वातावरण खराब करण्याचा प्रयत्न करू नये. त्या जाणिवपूर्वक धार्मिक तेढ निर्माण करत आहेत. आपण खासदार असल्याचा विसर त्यांना पडला आहे, असे रुपाली ठोंबरे यांनी म्हटले आहे.

त्या पुढे म्हणाल्या, कोथरुडमध्ये नाटक झाले. आता कसब्यातून येऊन जाणिवपूर्वक हिंदूमुस्लिम तेढ निर्माण करण्याचा प्रयत्न होत आहे. त्यामुळे खासदार मेधा कुलकर्णी यांच्यावर तातडीने गुन्हा दाखल करण्याची गरज आहे. त्यांना प्रार्थना करणे व दुवा करणे एकच आहे. हे त्यांना समजत नाही. त्या मुद्दाम वातावरण बिघडवण्याचा प्रयत्न करत आहेत.

सुषमा अंधारे यांची वादात उडी
शिवसेना उद्धव बाळासाहेब ठाकरे पक्षाच्या उपनेत्या सुषमा अंधारे यांनी शनिवारवाड्यात अगणितवेळा नमाज पठण झाल्याचा ऐतिहासिक दाखला दिला आहे. शनिवारवाड्याचा इतिहास भाजपभक्तांना चांगलाच माहित आहे. ज्या शनिवारवाड्यावर मस्तानी बाईसाहेब राहिल्या तिथे किती वेळा नमाज अदा झाली असेल याची कदाचित गिनती ही करता येणार नाही मात्र मेधा कुलकर्णी यांना पुण्याच्या राजकारणात आणि एकूणच पुणे भाजपवृंदामध्ये अजिबात नसलेले स्थान मिळवण्यासाठी दरवेळी हा अजागळपणा करणे आणि गोंगाट करून का होईना मीडिया फुटेज मिळवणे ही त्यांची राजकीय अपरिहार्यता आणि अगतिकता सुद्धा आहे, असे त्यांनी म्हटले आहे.

वादग्रस्त ठिकाणी गोमूत्र शिंपडण्याचा प्रयत्न
उल्लेखनीय बाब म्हणजे शनिवारवाड्यातील व्हिडिओ व्हायरल झाल्यानंतर खासदार मेधा कुलकर्णी रविवारी प्रचंड आक्रमक झाल्या होत्या. त्यांनी व पतीत पावन संघटनेच्या कार्यकर्त्यांनी रविवारी शनिवारवाडा परिसरात शिववंदना घेण्याचा प्रयत्न केला. त्यांनी या परिसरात गोमूत्रही शिंपडले. यावेळी त्यांचा पोलिसांशी वादही झाला. ज्या ठिकाणी नमाज पठण करण्यात आला, त्या जागी जाऊन आम्हाला शुद्धीकरण करायचे आहे, असा आक्रमक पवित्रा त्यांनी घेतला होता पण पोलिसांनी त्यांना शनिवारवाड्यात जाण्यास मनाई केली.

काय आहे वादाचा केंद्रबिंदू?
पुण्यातील शनिवारवाडा ही वास्तू मराठा साम्राज्याची शान आहे. या वास्तूने पेशव्यांचा यशाचा व र्‍हासाचाही इतिहास पाहिला पण आता येथील एका कबरीवरून वादाची ठिणगी पडली आहे. यासंबंधीच्या माहितीनुसार, या कबरीवर हजरत ख्वाजा सैय्यद शाह पीर मकबुल हुसेनी पीर असा बोर्ड आहे. पण ही कबर कुणी व कधी बांधली याची मुबलक माहिती उपलब्ध नाही त्यामुळे शनिवारवाड्यातील ही कबर अनधिकृत असल्याचा आरोप हिंदुत्त्ववादी संघटनांनी केला आहे. हिंदू संघटनांनी आता ही कबर हटवण्यासाठी पोलिसांना 8 दिवसांचा अल्टिमेटम दिला आहे.