शनी असल्याचे सांगून वृद्धाकडील अंगठी लांबवली : अमळनेर पोलिसांनी काही तासात आवळल्या त्रिकूटाच्या मुसक्या
They stole the ring from an old man, claiming it was Saturn : Amalner police arrested the trio within a few hours अमळनेर (20 ऑक्टोबर 2025) : वृद्धाला बोलण्यात गुंतवत भामट्यांनी त्याच्याकडील अंगठी लांबवली होती मात्र अमळनेर पोलिसांनी अवघ्या काही तासात आरोपींच्या मुसक्या बांधल्या. ही घटना शनिवार, 18 रोजी 11.30 वाजता अमळनेर बसस्थानकावर घडली. आरोपींचा एक साथीदार पसार झाला असून त्याचा शोध सुरू आहे.
काय घडले अमळनेर शहरात ?
चाळीसगाव तालुक्यातील मेहुणबारे येथील बळवंतराव जयवंतराव वाघ (86) हे आपल्या जावयाकडे गांधली, ता.अमळनेर येथे सुभाष रामराव देशमुख यांच्याकडे येण्यासाठी बसस्थानकावर आले. जावयाने बाजार करून येतो तोपर्यंत सासरे देशमुख यांना बसस्थानकावर थांबायला सांगितले. काही वेळात एक इसम आला आणि त्याने वृद्धाला शेगाव जाणारी बस किती वाजता आहे ? अशी विचारपूस केली.
वृद्धाने कंट्रोल कॅबीनला विचारा असे सांगितल्यावर दुसरा इसम आला. त्याने पहिल्याला विचारले की, माझ्या घरात सतत भांडण कटकटी होतात. तेव्हा पहिल्याने त्याला सांगितले की तुला शनी आहे, असे सांगून त्याने खालून खडा उचल आणि बाबांच्या हातात ठेव म्हणून सांगितले. पहिल्याने वृद्धाला मूठ बंद करायला सांगून मंत्र पुटपुटला. आणि वृद्धाच्या हातात रुद्राक्ष तयार झाले.
ते रुद्राक्ष पहिल्याने घेऊन दुसर्‍याच्या हातात दिले व त्याला ते देव्हार्‍यात ठेवायला सांगितले आणि दक्षिणा मागितली. त्यावेळी तिसर्‍या जोडीदाराने त्याला दक्षिणा दिली. पहिल्याने तेव्हा वृद्धाला सांगितले की बाबा तुम्हाला पण शनी आहे तुम्ही पण दक्षिणा द्या. त्यानंतर त्यांनी वृद्धाजवळील 20 रुपयांची नोट घेऊन त्यांच्या बोटातील अंगठी काढून घेतली आणि 20 रुपयांच्या नोटेत ती अंगठी बंद करून दुसर्‍याला वृद्धाच्या खिशात ठेवायला लावली. वृद्धाला सांगितले की, तुमची गाडी लागली आहे. तुम्ही मागे न पाहता पुढे जा. अंगठी खिशात राहू द्या, शनी निघून जाईल.
वृद्ध काही अंतर गेल्यावर भानावर आला. त्याने खिश्यात पाहिले असता अंगठी गायब होती. मागे वळून पाहिले तेव्हा ते चारही अनोळखी इसम गायब होते. ही घटना बसस्थानकावरील असलेले पोलीस वाडिले याना कळताच पोलिस निरीक्षक दत्तात्रय निकम यांना कळवण्यात आले. त्यांनी हेड कॉन्स्टेबल संतोष नागरे प्रशांत पाटील, उज्वलकुमार म्हस्के, गणेश पाटील, नितीन कापडणे याना चोरांना शोधण्यास पाठवले. पोलिसांनी तांत्रिक बाबींवरून चोरटे मोटरसायकलवर पळत असल्याचे समजताच नाकाबंदी लवून सरळ शिरपूर टोल नाक्यावर आरोपींना पकडण्यात आले.
या आरोपींना अटक
पोलिसांनी त्यांची नावे विचारली असता त्यांनी त्यांची नावे खुदबु नाजीर मदारी (30, लकडकोट येवला), भैय्या आयुब मदारी (27) व शाहरुख उर्फ शाहरु हसन मदारी (25, दोन्ही रा.नगरदेवळा, ता.पाचोरा) असे सांगितले तर एक संशयीत पसार झाला. पोलिसांनी खाक्या दाखवताच त्यांनी 50 हजार रुपये किंमतीची सोन्याची अंगठी आणून दिली.
