मराठवाड्यातील पूरग्रस्तांसाठी 346 कोटी 31 लाखांची मदत : रक्कम मात्र दिवाळीनंतर खात्यात जमा होणार !
छत्रपती संभाजीनगर (21 ऑक्टोबर 2025) : अतिवृष्टीसह पुरामुळे हैराण झालेल्या मराठवाडा विभागातील शेतकर्‍यांसाठी राज्य सरकारने तिजोरी खुली करीत 346 कोटी 31 लाख 70 हजार रुपयांची मदत मंजूर केली असलीतरी ही रक्कम दिवाळीनंतरच शेतकर्‍यांच्या खात्यावर जमा होणार आहे.
पावसाने हाता-तोंडाचा घास हिरावला
जून ते सप्टेंबर या काळात मराठवाड्यात सलग पावसाने थैमान घातले होते. या काळात अनेक जिल्ह्यांत नदी-नाल्यांना पूर आले. घरे आणि शेती पिके वाहून गेल्याने तीन लाख 58 हजार 612 शेतकर्‍यांचे तीन लाख 88 हजार हेक्टरवरील पीक पूर्णपणे उद्ध्वस्त झाले. काही भागांमध्ये शेतजमीनही वाहून गेल्याने शेतकर्‍यांवर आर्थिक संकट ओढवले त्यामुळे राज्य सरकारने गेल्या पंधरवड्यातील हा चौथा मदतनिधीचा अध्यादेश जारी केला आहे. या अंतर्गत मराठवाड्यातील सात जिल्ह्यांना मदत वितरित केली जाणार आहे.
दिवाळीनंतर रक्कम येणार खात्यावर !
शासनाच्या या निर्णयामुळे स्थानिक प्रशासनाकडून नुकसानीचे सर्वेक्षण पूर्ण झाल्यानंतर शेतकर्‍यांच्या खात्यात थेट पैसे जमा केले जातील मात्र, प्रशासकीय प्रक्रिया आणि निधी हस्तांतरणाच्या टप्प्यांमुळे ही रक्कम दिवाळीनंतरच उपलब्ध होण्याची शक्यता व्यक्त केली जात आहे.
जिल्हानिहाय असे झाले मदत निधीचे वितरण
संभाजीनगर : 81 कोटी 62 लाख
बीड : 67 कोटी 24 लाख
लातूर : 35 कोटी 72 लाख
परभणी : 49 कोटी 42 लाख
जालना : 64 कोटी 75 लाख
हिंगोली : 11 कोटी 30 लाख
नांदेड : 36 कोटी 22 लाख
एकूण मदतनिधी : 346 कोटी 31 लाख 70 हजार
या रकमेमुळे मोठ्या प्रमाणावर नुकसान झालेल्या शेतकर्‍यांना काहीसा दिलासा मिळेल, असा राज्य सरकारचा दावा आहे.
