जळगावात माजी मंत्री एकनाथराव खडसेंच्या बंगल्यात घरफोडी

बंद बंगल्याला केले टार्गेट
माजी मंत्री तथा विधान परिषद आमदार एकनाथराव खडसे यांचे जळगाव शहरामध्ये जिल्हाधिकारी कार्यालयाजवळ शिवराम नगरात बंगला आहे. ममाजी मंत्री खडसे येथे नेहमी ये-जा करतात मात्र सध्या दिवाळीनिमित्त आमदार खडसे हे त्यांच्या मूळ गावी कोथळी येथे वास्तव्यास गेले आहेत.

मंगळवार, 28 ऑक्टोबर रोजी सकाळी 9 वाजता घराची राखण करणारा कर्मचारी चेतन आल्यानंतर त्याला बंगल्याच्या गेटचे कुलूप तुटलेले दिसले. त्यांनी लगेच आमदार खडसे आणि कार्यकर्ते अशोक लाडवंजारी यांना कळवले. अशोक लाडवंजारी यांनी येऊन घराची तपासणी केली असता घरातून 8 ते 9 तोळे सोने व 35 हजार रोख रक्कम चोरीस गेल्याची प्राथमिक माहिती समोर आली.

पोलिसांची धाव
रामानंदनगर पोलिस स्टेशन तसेच जिल्हा पोलिस अधीक्षक डॉ.महेश्वर रेड्डी यांना माहिती कळवण्यात आल्यानंतर पोलिस दल घटनास्थळी दाखल झाले. त्यानंतर पोलिसांनी तपासणीला सुरुवात केली. या ठिकाणी श्वान पथक, ठसे तज्ज्ञ यांनी पाहणी केली. श्वानाने घरापासून आचार्य विद्यालयापर्यंत मार्ग दाखवला मात्र तो तेथेच घुटमळ्ल्याचे दिसून आले.

या ऐवजावर मारला डल्ल
आमदार खडसे यांच्या बंगल्यातून चार अंगठ्या आणि त्यांच्या घरातील कर्मचारी गोपाल सरोदे यांचे सुमारे सात तोळ्याचे सोने असे चोरीला गेल्याची प्राथमिक माहिती कार्यकर्त्यांनी दिली. राजकीय व्यक्तींच्या घरी चोरी झाल्यामुळे सामान्य जनतेचे काय ? असा प्रश्न उपस्थित होत आहे.

रामानंद नगर पोलिस ठाणे हद्दीत गुन्हेगारी वाढत असल्याचे आता दिसून येत आहे. घटनास्थळी उपविभागीय पोलिस अधिकारी नितीन गणापुरे, एलसीबीची निरीक्षक राहुल गायकवाड यांच्यासह कर्मचार्‍यांनी धाव घेतली. सीसीटीव्ही फुटेज तसेच फॉरेन्सिक पथकाकडून तपासणी सुरू करण्यात आली आहे तर श्वान पथकानेही काही अंतरापर्यंत माग दाखवल्याने त्या दृष्टीने आता तपास सुरू आहे.