Bus accident near Nashirabad: Female passenger from Padalse crushed to death नशिराबाद (28 ऑक्टोबर 2025) : भरधाव बसचे टायर फुटून झालेल्या अपघातात बसमधील प्रवासी बाहेर फेकली जावून टायर खाली आल्याने गणप्राण झाली. हा अपघात नशिराबाद टोल नाक्याजवळ मंगळवार, 28 ऑक्टोबर रोजी दुपारी 12.30 वाजेच्या सुमारास घडला. याप्रकरणी नशिराबाद पोलिसात अपघाताची नोंद करण्यात आली. साराबाई गणेश भोई (46, रा.पाडळसा, ता.यावल) असे ठार झालेल्या महिला प्रवाशाचे नाव आहे.
असा घडला अपघात ?
अमळनेर आगाराची बस (एम.एच.14 बी.टी.2306) ही जळगावकडून भुसावळकडे जात असताना नशिराबाद टोल नाक्याजवळ बसच्या समोरील चाकांपैकी एक टायर फुटले व बस थेट टोल नाक्याजवळील एका भिंतीवर जाऊन आदळली.
या अपघातात बसमधील प्रवासी साराबाई गणेश भोई (46, रा.पाडळसे, ता.यावल) बसच्या चाकाखाली येवून चिरडून ठार झाल्या. त्यांच्या पश्चात पती व तीन मुले असा परिवार आहे. पती शेंगदाणे, फुटाणे विक्री करून उदरनिर्वाह करतात. मयत विवाहिता साराबाई भोई या डोळे तपासण्यासाठी जळगाव शहरात आल्यानंतर परतीच्या प्रवासात त्यांच्यावर अपघाताने घाला घातला.
अपघातानंतर परिसरात एकच खळबळ उडाली. अपघात घडताच स्थानिक नागरिक आणि टोल नाक्याजवळील वाहनधारकांनी तातडीने घटनास्थळी धाव घेऊन मदत कार्याला सुरुवात केली. अपघाताची माहिती मिळताच नशिराबाद पोलिस ठाण्याचे कर्मचारी घटनास्थळी दाखल झाले.
