चॅप्टर केस न करण्यासाठी दोन हजारांची लाच भोवली : अक्कलकुव्यातील हवालदार धुळे एसीबीच्या जाळ्यात
गणेश वाघ
Bribed Rs 2,000 to not file a chapter case : Constable from Akkalkuva in Dhule caught by ACB भुसावळ (29 ऑक्टोबर 2025) : चॅप्टर केस न करण्याच्या मोबदल्यात तडजोडीअंती दोन हजारांची लाच स्वीकारणार्या अक्कलकुवा पोलिस ठाण्यातील हवालदाराला धुळे एसीबीने रंगेहाथ अटक केल्याने पोलिस दलातील लाचखोर हादरले आहेत. शैलेश विजयसिंग गावीत (53, शंकर नगर, नंदुरबार) असे अटकेतील आरोपीचे नाव आहे.
असे आहे लाच प्रकरण
तक्रारदाराच्या भावाविरोधात महिलेने तक्रार दिल्याने 1 ऑक्टोबर रोजी अक्कलकुवा पोलिसात एनसी केस दाखल करण्यात आली. एनसी प्रकरणाची चौकशी सहाय्यक पोलिस उपनिरीक्षक महेंद्र जाधव यांनी केल्यानंतर चॅप्टर केस न करण्यासाठी जाधव यांनी त्यावेळी तीन हजार रुपये स्वीकारले होते. त्यानंतर तक्रारदार हे पोलिस ठाण्याजवळून जात असताना संशयीत गावीत यांची भेट झाली व त्याने यापूर्वी तू फक्त तीन हजार रुपये दिले आहेत व अजून तीन हजार रुपये लागतील व पैसे न दिल्यास चॅप्टर केस दाखल करून त्याला अटक करू, असा दम भरला.
तक्रारदाराने लाचेबाबत धुळे एसीबीला दूरध्वनी करीत तक्रार दिल्यानंतर लाच पडताळणीदरम्यान गावीत याने तडजोडीअंती अडीच हजार रुपये स्वीकारण्याचे मान्य केले व सापळादरम्यान दोन हजारांची लाच स्वीकारताच पथकाने गावीत यास अटक केली.
यांनी केला सापळा यशस्वी
धुळे एसीबीचे पोलिस उपअधीक्षक सचिन साळुंखे यांच्या नेतृत्वात पोलिस निरीक्षक पद्मावती कलाल, पोलिस निरीक्षक यशवंत बोरसे, हवालदार राजन कदम, मुकेश अहिरे, प्रवीण मोरे, संतोष पावरा, कॉन्स्टेबल मकरंद पाटील, प्रवीण पाटील, सागर शिर्के, हवालदार सुधीर मोरे आदींच्या पथकाने हा सापळा यशस्वी केला.
