शहाद्यातील सराफा व्यापार्‍याचे अपहरण करीत लाखोंचे दागिने लुटले : धुळ्यासह शहादा तालुक्यातील टोळीला बेड्या
गणेश वाघ
Gang from Shahada taluka arrested along with Dhula for kidnapping a bullion merchant in Shahada and robbing him of jewellery worth lakhs भुसावळ (3 नोव्हेंबर 2025) : नंदुरबार जिल्ह्यातील शहाद्यातील सराफी व्यावसायीकाचे सिनेस्टाईल अपहरण करीत दरोडेखोरांनी लाखो रुपये किंमतीचे सोन्या-चांदीचे दागिने लुटले होते. या प्रकरणी गुन्हा दाखल झाल्यानंतर समांतर तपासात नंदुरबार गुन्हे शाखेसह स्थानिक शहादा पोलिसांनी पाच जणांच्या टोळीला अटक केली आहे. आरोपी शहादा तालुक्यातील तसेच धुळ्यातील रहिवासी असून त्यांच्याकडून चार हजार 500 ग्रॅम वजनाचे चांदीचे दागिने तसेच 52 हजार 400 रुपयांची रोकड जप्त करण्यात आली.
काय आहे नेमके प्रकरण ?
शहाद्यातील सराफी व्यावसायीक रितेश पारेख हे सोमवार, 27 ऑक्टोबर रोजी शहादा येथील घरुन सोने, चांदीच्या वस्तू घेवून म्हसावद येथील दुकानाकडे मोटारीने निघाले होते. ते पाडळदा बुडीगव्हाणमार्गे म्हसावदकडे जात असतांना सकाळी दहाच्या सुमारास एका मोटारीतून आलेल्या पाच जणांनी बंदुक आणि धारदार शस्त्राचा धाक दाखवत रितेश यांचे त्यांच्या मोटारीसह अपहरण केले. रितेश हे म्हसावदकडे जात असतांना ते आपल्या बहिणीशी मोबाईलवरुन संवाद करत होते. अचानक त्यांची मोटार फोडली गेल्याचा आणि काहीतरी गडबड झाल्याचा आवाज आल्याने त्यांच्या बहिणीने त्यांच्या मोटारीचा अपघात झाला का, याची विचारणादेखील केली होती मात्र काही क्षणात फोन करतो, असे सांगत रितेश यांनी फोन बंद केला होता. त्यामुळे बहिणीचा संशय बळावला. त्यांनी घरी फोन करुन रितेश यांच्या पत्नीला याबाबत सांगितले. यानंतर कुटुंबियांनी फोन करुन शहानिशा केली असता रितेश म्हसावद येथील दुकानात पोहचलाच नसल्याचे उघड झाल्याने त्यांचे अपहरण झाल्याचा संशय बळावल्याने कुटुंबियांनी शहादा पोलिस ठाणे गाठले.
सहा तासानंतर सुटका
दरोडेखोरांनी सराफा व्यापारी रितेशला धुळे-अमळनेर रोडवरील नवलनगरपुढे एका अज्ञातस्थळी दरोडेखोरांनी सोडून देत पलायन केले. रितेश यांना मारहाण करुन त्यांच्याकडे असलेली 30 किलो चांदी. 200 ग्रॅम सोने आणि सहा लाख रुपये रोख घेवून दरोडेखोरांनी पोबारा केला. रस्त्यावर येत रितेशने घरी फोन लावून आपण असलेल्या ठिकाणाचा पत्ता दिल्यानंतर पोलिस आणि त्याचे कुटुंबीय तिथे पोहचले होते.
पाचा आरोपींना अटक
गुन्हा करण्याची पद्धत, खबर्‍यांचे नेटवर्क व तांत्रिक तपासाच्या आधारे नंदुरबार गुन्हे शाखेसह शहादा पोलिसांनी संशयीत भरत गोविंद वडार (49, औरंगपूर, ता.शहादा), रोहित ऊर्फ गोल्या संजय मराठे (26, रा.कानडी, ता.शहादा), अक्षय पांडुरंग सोनार (31, रा.रामेश्वर मंदीरजवळ, सोनारगल्ली, शहादा), पूर्वेश रमेश सोनवणे (31, रा.जुनी पोस्ट गल्ली, शहादा), निलेश नाना पवार (33, रा.सिध्देश्वर हॉस्पीटल, गरुड कॉलनी, देवपूर धुळे) यांना अटक करण्यात आली.आरोपींना पोलिसी खाक्या दाखवताच त्यांनी गुन्ह्याची कबुली देत 4500 ग्रॅम वजनाचे चांदीचे दागिने व 52 हजार 400 रुपयांची रोकड काढून दिली.
यांनी आवळल्या आरोपींच्या मुसक्या
ही कारवाई नंदुरबार पोलिस अधीक्षक श्रवण दत्त.एस, अपर पोलीस अधीक्षक आशीत कांबळे, शहादा उपविभागीय पोलिस अधिकारी दत्ता पवार यांच्या मार्गदर्शनाखाली स्थानिक गुन्हे शाखेचे वरिष्ठ पोलिस निरीक्षक हेमंत पाटील, शहादा पोलिस निरीक्षक निलेश देसले, एपीआय प्रवीण सोनवणे, फौजदार मुकेश पवार, फौजदार विकास गुंजाळ, फौजदार भुनेश मराठे, हवालदार पुरुषोत्तम सोनार, मोहन ढमढेरे, सचिन वसावे, महेंद्र नगराळे, दादाभाई वाघ, योगेश थोरात, देविदास विसपुते, नाईक विकास कापुरे, दीपक चौधरी, शोएब शेख, भगवान सावळे आदींच्या पथकाने केली.
