School bus accident at Amlibara Ghat: Two students of Mehunbare Ashram School killed! अक्कलकुवा (9 नोव्हेंबर 2025) : चाळीसगाव तालुक्यातील मेहुणबारे येथील अनुदानीत आश्रमशाळेतील विद्यार्थ्यांना दिवाळी सुटीनंतर घेण्यासाठी गेलेल्या स्कूल बसला आंमलीबारी घाटात अपघात घडल्यानंतर दोन विद्यार्थी जागीच ठार झाल्याचे वृत्त असून 56 विद्यार्थी जखमी झाल्याची माहिती समोर आली आहे. बस घाटातील एका वळणावरून अनियंत्रित होऊन दरीत कोसळल्याची माहिती सूत्रांनी दिली.
दिवाळीच्या सुटीत गावी गेले होते विद्यार्थी
चाळीसगाव तालुक्यातील मेहुणबारे येथे अनुदानीत आश्रमशाळा असून त्यात तळोदा व अक्कलकुवा भागातील शेकडो विद्यार्थी शिक्षण घेतात. दिवाळीच्या सुटीनिमित्त विद्यार्थी मूळ गावी परतले होते मात्र सुट्टी संपल्याने या आश्रमशाळेच्या दोन बस विद्यार्थ्यांना त्यांच्या घरी म्हणजेच अक्कलकुवा तालुक्यातील मोलगी परिसरातील विविध गावांतून घेण्यासाठी आल्या होत्या. देवगोई घाटातून परतत असताना याच दोन बसपैकी एका बसला अपघात झाला आणि ती 100 ते 150 फूट खोल दरीत कोसळली.
दोन विद्यार्थी ठार झाल्याची भीती ?
समजलेल्या प्राथमिक माहितीनुसार, जगदीश बहादूरसिंग तडवी (इयत्ता 2 री, रा. निबीपाडा), कपिला जाहागीर राऊत (इयत्ता 7 वी, काठी) यांचा या अपघातात मृत्यू झाला असून 56 विद्यार्थी जखमी झाले आहेत. अपघात इतका भीषण होता की, बस थेट खडकांवर आदळल्याने तिचे मोठे नुकसान झाले. स्थानिक ग्रामस्थांनी तत्काळ घटनास्थळी धाव घेत बचावकार्य सुरू केले. अक्कलकुवा ग्रामीण रुग्णालयात जखमींवर उपचार सुरू आहेत.
पालकांकडून शाळा प्रशासनावर हलगर्जीपणाचा आरोप
अपघाताची माहिती मिळाल्यानंतर विद्यार्थ्यांचे पालक रुग्णालयाच्या दिशेने धाव घेत आहेत. या दुर्घटनेनंतर विद्यार्थ्यांच्या सुरक्षेचा प्रश्न पुन्हा एकदा गंभीर बनला आहे. सातपुड्याच्या दुर्गम भागातील विद्यार्थी मोठे स्वप्न घेऊन शाळेत जातात मात्र अनेक स्कूल बसमध्ये क्षमतेपेक्षा जास्त विद्यार्थी कोंबले जातात आणि शाळा प्रशासन याकडे दुर्लक्ष करते, असा गंभीर आरोप संतप्त पालकांनी केला आहे.
