एमपीतील व्यापार्याला मारहाण करीत लाखाच्या बदल्यात दिल्या पाच लाखांच्या नकली नोटा
मारहाणीत चार संशयीत जखमी : नकली नोटांचे रॅकेट समोर येण्याची शक्यता
बोदवड (28 नोव्हेंबर 2025) : एक लाख रुपयांच्या बदल्यात पाच लाखांच्या नोटा देण्याच्या आमिषाला मध्यप्रदेशचा व्यापारी भाळला व युट्यूबवरील जाहिरातीद्वारे मुक्ताईनगर रोडवरील नांदगाव उड्डाणपुलाजवळील कोल्हाडी गावाजवळील रस्त्यावर आल्यानंतर सात संशयीतांनी त्यास मारहाण केली. ही घटना 27 रोजी सकाळी साडेसहा वाजेच्या सुमारास घडली. याप्रकरणी सात जणांविरुद्ध दरोड्याचा गुन्हा दाखल करण्यात आला. दरम्यान, मारहाण व फसवणुकीच्या प्रकारादरम्यान गावकरी धावून आल्यानंतर चार संशयीतांना पकडण्यात आले व मारहाणीत ते जखमी झाल्याने त्यांना उपचारार्थ हलवण्यात आल्याचे समजते.
काय घडले व्यापार्यासोबत
मंगळवार, 27 नोव्हेंबर 2025 पहाटे सहा वाजेच्या सुमारास मुक्ताईनगर रोडवर फिर्यादी प्रेमचंदजी पिपलोदिया (44, व्यवसाय-इलेक्ट्रिक दुकान, रा. डाक बंगला जवळ, सुसनेर, ता. सुसनेर, जि. आगर, मध्य प्रदेश) यांना आरोपींनी युट्यूब व्हिडिओद्वारे अमिष दाखवून फिर्यादींला नमूद ठिकाणी बोलावले.
यावेळी आरोपींनी भारतीय ‘बच्चो का बँक’ लिहिलेल्या लहान मुलांच्या खेळण्यांमधील नोटा देण्याचा प्रस्ताव ठेवला मात्र, फिर्यादींनी एक लाख देण्याचे नाकारल्यावर आरोपी क्रमांक 1 ते 7 यांनी फिर्यादी व त्यांच्या मित्र गिरीराज परमानंदजी पवार यांना मारहाण करून फिर्यादीजवळ असलेली पिशवीत ठेवलेली रोकड हिसकावली.
यांच्याविरोधात गुन्हा
गुन्हा दाखल आरोपींमध्ये सैय्यद साबीर सैय्यद शफिक (30, रा.कुर्हाकाकोडा, ता.मुक्ताईनगर), अंकल अशोक पारधी (28, रा.रेवती, ता.बोदवड), करण किरण बोदडे (रा.शेलवड, ता.बोदवड), प्रशांत समाधान पाटील (रा.कुर्हाकाकोडा, ता.मुक्ताईनगर), सैय्यद शेरीफ सैय्यद शफिक (कुर्हाकाकोडा, ता.मुक्ताईनगर), निलेश ईश्वर गुरचळ (रा.नाडगाव, ता.बोदवड), विकी ईश्वर गुरचळ (रा.नाडगाव, ता. बोदवड) यांचा समावेश आहे.
