भुसावळातील के.नारखेडे विद्यालयात संविधान दिन उत्साहात
भुसावळ (29 नोव्हेंबर 2025) : भुसावळ शहरातील के.नारखेडे विद्यालयात बुधवार, 26 रोजी संविधान दिनानिमित्त विद्यालयात विविध कार्यक्रम व स्पर्धांचे आयोजन करण्यात आले. विद्यालयाच्या प्रभारी मुख्याध्यापिका संगीता अडकमोल यांच्याहस्ते भारतरत्न डॉक्टर बाबासाहेब आंबेडकर यांच्या प्रतिमेस पुष्पहार अर्पण करून संविधान पूजन करण्यात आले.
यांची होती उपस्थिती
याप्रसंगी संस्था सेक्रेटरी पी.व्ही.पाटील, संगणक विभाग प्रमुख बी.ए. पाटील, भाऊसाहेब प्रमोद तळेले यांची सुद्धा उपस्थिती होती. विद्यालयाचे उपशिक्षक व्ही.बी.पाटील यांनी संविधान निर्मिती प्रक्रिया व संविधानातील मूलभूत हक्क आणि कर्तव्य यांची माहिती दिली. सकाळ व दुपार शाखेतील विद्यार्थ्यांकडून संविधान उद्देशिकेचे सामूहिक वाचन करण्यात आले. संगीत शिक्षक डी.एम.हेलोडे यांनी विद्यार्थ्यांकडून देशभक्तीपर गीतांचे गायन करवून घेतले. संविधानाच्या संदर्भातील घोषवाक्य देत शालेय परिसरात विद्यार्थ्यांची प्रभात फेरी काढण्यात आली.





या निमित्ताने विद्यालयात चित्रकला स्पर्धा, पोस्टर्स स्पर्धा व हस्तकला स्पर्धा अशा विविध स्पर्धांचे आयोजन करण्यात आले.
दुपार शाखेत एस.पी.महाजन यांनी प्रश्नमंजुषा स्पर्धेचे यशस्वीपणे आयोजन केले. चित्रकला व पोस्टर्स स्पर्धेसाठी माधव गरूडे यांनी उत्तम नियोजन केले. दुपार शाखेला संविधान रॅलीसाठी सपकाळे, नेहेते व नेमाडे सर यांनी परिश्रम घेतले. विद्यालयातील उपशिक्षिका रिता महाजन व स्वाती इखे यांनी मानवनिर्मित साखळीचे उत्तमपणे आयोजन केले व याप्रसंगी सुद्धा विद्यार्थ्यांकडून उद्देशिकेचे वाचन करण्यात आले. यानिमित्ताने विद्यालयाच्या प्रभारी मुख्याध्यापिका संगीता अडकमोल मॅडम व पर्यवेक्षक एस.पी.पाठक यांनी संविधान दिनाचे महत्त्व , संविधानाचे वैशिष्ट्य व जीवनात संविधानाची आवश्यकता याविषयी आपले मनोगत व्यक्त केले. दुपार शाखेला सर्व कार्यक्रम यशस्वीतेसाठी संदीप पाटील, भानुदास जोगी, सुरेश कापसे यांनी विशेष प्रयत्न केले.
